Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Đn 12. 1-3
Tŭ hơ̆, làng-bol mê rơ̆p geh tơngklàs.
Đăl tam sră Đaniel, cau ala-bơr dê.
Tŭ hơ̆, kuăng huềng-duh Mikae ñă-ntào tò-dong oh kòn làng-bol mê dê in, hơ̆ rơ̆p lah tơngai sơrbơng-rơng ờ hềt gŏ gơlĭk tŭs, bơh tŭ geh ală jơi-nòi jơl tŭs tŭ do. Tam tơngai hơ̆, làng-bol mê, di cau lơi neh geh cĭh măt tam sră, rơ̆p geh tơngklàs. Găl cau lơhă bĭc tam kơmbŭh-ù, rơ̆p ñă-guh: Cau bà rơ̆p geh dờp bơta bơtoăh gơ̆s sùm, cau bà păl bàssìl jơl ală rài. Bol cau ngăc-ngờ pờ tơlờng rơ̆p àng gơcrà be àng trồ dê, mơ bol cau bơtê-bơto bơta song-dơpă găl cau in, rơ̆p gơjềng be ală sơrmañ găm wơl jơl ală rài.
Hơ̆ jơnau đơ̆s Kơnràñ dê.
Nrĭ-nrềng: 15. 5 mơ 8, 9-10, 11
Hw: Ơ Kơnràñ, dăn gràng-gàr kòn, bơh kòn jòi sơnđìng dơ Đi.
Kơnràñ gơ̆s jơtài mơ coàn kòn dê, Khai tờm ăt-prăp să kĭs kòn dê. Kòn sùm tơnơn Kơnràñ tơđăp măt kòn, bơh Kơnràñ nggui đah ma kòn, kòn rơ̆p ờ gơplơ̆ nùs. Hw
Bơh hơ̆, nùs kòn chờhờp mơ sồp-soàn kòn rơhờn, jơh sơl poăc-să kòn dê krung bĭc rơlô-bòl lơngai, bơh Kơnràñ ờ săng-lời sồp-soàn kòn tam làng-bồc, krung ờ lời cau niămgoh Khai dê gŏ bơta ồm-lề. Hw
Kơnràñ rơ̆p sơnđio kòn in gĭt gùng-dà kĭs sùm, bơta bềng hờm rơhờn ơm dơ đăp măt Kơnràñ, bơta hừh-hơh đah tê ma Kơnràñ jơl jơh ală rài. Hw
Bơta đăl bàr: Hebrơ 10. 11-14, 18
Khai neh lơh bol cau geh pơniăm-goh in gơjềng niăm wil-tơl jơl jơh ală rài.
Đăl tam sră Paulo, cau Dờp-pơyoa bơtoăh, pơyoa bol Hebrơ in.
Ơ oh mi kờñ-gơboh, tam tŭ ală cau kơiơng-yàng pah ngai ntào rềp jơnao duh-khoai bơsir gơnoăr-broă he, mơ pồ-pơdơng krung kàr hơ̆ phan-ơn rà dơ̆, mơya ờ tŭ lơi tơnroh wơl tìs-glài, ai Khai, tŭ pơdơng rau phan-ơn dùl lơm săl tìs, neh nggui đah ma Yàng jơl ală rài, mơ bơh ndo, Khai kơ̆p-càng jơl tŭs tŭ bol sò- tơ̆m kong tơnơn lơh kơrnờl hơ đơm jơng Khai. Kơyoa, kơnờm dơ broă pồ-pơdơng dùl lơm, mơ Khai neh lơh bol cau geh pơniăm-goh in gơjềng niăm wil-tơl jơl jơh ală rài. Be hơ̆, tềng lơi tìs-glài geh hồ-lời, gen ờ găm broă pơdơng phan-ơn săl tìs tai.
Hơ̆ jơnau đơ̆s Kơnràñ dê.
ALLELUIA: Yt 2. 10c
Alleluia. Alleluia. Kơnràñ đơ̆s: Mê prăp tĕ nùs dờn-song jơl tŭs chơ̆t, gen Añ rơ̆p pà mê in sơgơn bơta kĭs dê. Alleluia.
Jơnau Yălniăm: Mk 13. 24-32
Khai rơ̆p tơrgùm ală cau geh rơwăh Khai dê bơh poăn mum ù.
Đăl tam Jơnau Yălniăm niămgoh jăt Marko.
Tŭ hơ̆, Kơnràñ Jesu đơ̆s mơ bol jăt-dờn be do: “Tam ală ngai hơ̆, tơnơ̆ mơ bơta kòl-yăn kal-ke, gen măt-tơngai rơ̆p gơ̆s jơngo, àng-kơnhai rơ̆p ờ ai bơta àng tai, rơ̆p geh ală sơrmañ dùh bơh trồ, mơ ală pràn-gơnoăr ơm tam trồ rơ̆p kong gơ ơwăñ. Tŭ hơ̆, cau rơ̆p gŏ Kòn kòn-bơnŭs tŭs tam mhoăl bal mơ pràn-gơnoăr mơ bơta gơklŏ. Tŭ hơ̆, Khai rơ̆p pơyoa bol huềng-duh lòt, mơ Khai rơ̆p tơrgùm ală cau geh rơwăh Khai dê bơh poăn mum ù, bơh jơng trồ do tŭs jơng trồ ne. Bol kòn bơsrăm tĕ jơnau pơniơu gơrềng bơh tờm chi băl: Tŭ ntê gơ dê bơnung mơ nha gơ căt, gen bol kòn gĭt lah kàl duh neh rềp rau. Ai bol kòn krung be hơ̆ sơl, tŭ gŏ ală bơta hơ̆ gơlĭk gơ̆s, gen bol kòn gĭt tĕ lah Kòn kòn-bơnŭs neh rềp, dơ mpồng rau. Di ngăn, Añ đơ̆s mơ bol kòn: Rơnàng do rơ̆p ờ gơ găn, jơl tŭs tŭ jơh ală bơta hơ̆ gơlĭk gơ̆s. Trồ mơ tiah rơ̆p gơ găn, mơya ală jơnau đơ̆s Añ dê rơ̆p ờ gơ găn. Gơrềng bơh ngai ngolah jiờ hơ̆, gen ờ geh cau lơi gĭt, bol huềng-duh tam trồ krung ờ, Kòn krung ờ sơl, mìng Bàp lơm.”
Hơ̆ jơnau đơ̆s Kơnràñ dê.
