Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Ll 16. 2-4, 12-15
Añ rơ̆p ai bañ bơh trồ gơ rung be mìu.
Đăl tam sră Lĭk-lòt.
Tam ală ngai hơ̆, jơh mơ mpồl-pơrjum oh kòn Israel lăh-yoăm Moise mơ Aaron, bol khai đơ̆s mơ bàr nă be do: Tiăn hi chơ̆t tam lơgăr Ejypto bơh tê Kơnràñ, tŭ hi nggui dơ gah glăh poăc mơ sa hừh-hờm. Ñchi gơlơh bol đi lăm hi tŭs blàng bràs do, làng jơh mơ mpồl di chơ̆t jơgloh be do taih ? Kơnràñ đơ̆s mơ mơ Moise be do: Do Añ rơ̆p ai bañ bơh trồ gơ rung be mìu: Làng-bol păl lòt khòm bañ sa pah ngai ngai, làng Añ lòng sền làng-bol prăp-dờn gùng-dà Añ dê sơl ờ. Añ neh kơno săp lăh-yoăm oh kòn Israel dê, mê đơ̆s tĕ mơ bol khai be do: Mho do bol mê rơ̆p sa poăc, mơ drim hìng rơ̆p sa bañ hừh-hờm, be hơ̆ bol mê rơ̆p đăl-gĭt Añ gơ̆s Yàng bol mê. Mho ngai hơ̆, geh sềm rơgŭt păr tŭs jơm-gòm mpồl sàl, mơ drim ngai tơnơ̆, geh dà bơryŭh gơ dùh gùt-dăr mpồl sàl. Tŭs tŭ dà bơryŭh gơ lề hơ đăng măt ù, gen gŏ geh phan lơi dêt dêt wil wil be găr bơryŭh gơ klăc-kơ̆t hơ đăng măt ù. Oh kòn Israel gŏ be hơ̆, gen tam lùp bal: Manhu, kờñ đơ̆s lah: Ñchi be hơ̆ taih ? Bơh bol khai ờ gĭt lah chi lơi. Moise đơ̆s mơ mơ bol khai: Gen gơ̆s bañ bơh Kơnràñ pà oh mi in sa.
Hơ̆ jơnau đơ̆s Kơnràñ dê.
Nrĭ-nrềng: 77. 3 mơ 4bc, 23-24, 25 mơ 54
Hw: Kơnràñ neh pà bol khai in geh bañ bơh trồ.
Jơnau mơ hi neh kơno, neh gĭt, mơ pàng yau neh yăl wơl hi in gĭt, hi rơ̆p yăl wơl rơnàng tơnơ̆ in, hơ̆ lah ală bơr jờngrơ mơ gơnăp-gơnoăr Kơnraàñ dê. Hw
Mơya Khai neh sồr ală mhoăl hơ đăng trồ jơnhoa, mơ Khai neh pờ wờk ală mpồng trồ, Khai neh tơđùh mìu manna làng bol khai sa, Mơ Khai neh pà bol khai in geh bañ bơh trồ. Hw
Kòn-bơnŭs geh sa bañ bol huềng-duh dê, Khai pà he in phan sa hừh-hờm. Khai cèng bol khai guh bơnơm niămgoh Khai dê, Gơ̆s bơnơm bơh tê ma Khai neh bơtào gơ̆s. Hw
Bơta đăl bàr: Ep 4. 17, 20-24
Soh wơl tĕ cau pa neh geh crơnggơ̆s jăt nùs Kơnràñ dê.
Đăl tam sră Paulo, cau Dờp-pơyoa bơtoăh, pơyoa bol Epheso in.
Ơ oh mi kờñ-gơboh, añ đơs mơ oh mi jơnau do, mơ lơh cơng-ngăn tam Kơnràñ lah oh mi bañ ơm-kĭs be làng-bol bơdìh ơm-kĭs, ràn jăt bơta pơrlồm gời nùs tồr he dê. Ai oh mi, oh mi ờ tŭ lơi bơsrăm gĭt Kơnràñ Kristo be hơ̆ ơ, mơya dilah oh mi neh kơno gĭt Khai, mơ neh geh bơsrăm tam Khai, be jơnau ngăn-ngồn tam Kơnràñ Jesu bơto, lah oh mi tă-tơlĭk tĕ gùng kĭs yau òr, hồ-pơlhồt tĕ să bơnŭs yau, neh kong ồm-lề jăt bơta hàm kờñ tìs gùng. Oh mi gơjềng pa wơl tĕ tam nùs tồr oh mi, soh wơl tĕ cau pa neh geh crơnggơsê jăt nùs Kơnràñ dê, tam bơta song-dơpă mơ niămgoh di bal mơ jơnau ngăn.
Hơ̆ jơnau đơs Kơnràñ dê.
ALLELUIA: Mt 4. 4b
Alleluia. Alleluia. Kòn-bơnŭs kĭs ờ di mìng bơh bañ lơm, mơya găm bơh jơh ală jơnau gơlĭk bơh bơr Yàng dê. Alleluia.
Jơnau Yălniăm: Jn 6. 24-35
Cau lơi tŭs mơ Añ, rơpê ờ jơgloh, mơ cau lơi pindờn dơ Añ, rơpê ờ tŭ lơi tơhìr.
Đăl tam Jơnau Yălniăm niămgoh jăt Joan.
Tŭ làng-bol gŏ lah ờ geh Kơnràñ Jesu tềng hơ,ê mơ bol jăt-dờn Khai dê krung ờ sơl, gen bol khai hào ahò mơ tŭs hơ Kapharnaum jòi Kơnràñ Jesu. Tŭ bàn Kơnràñ đah ne dà-lềng, bol khai đơs mơ Khai: “Ơ Rabbi, tŭ lơi Đi neh tŭs ndo ?” Kơnràñ Jesu hơ wơl mơ bol khai mơ đơ̆s: “Di ngăn, di ngăn, Añ đơs mơ bol mê: Bol mê jòi Añ, ờ di bơh bol mê neh gŏ ală tềl krơi, mơya bơh bol mê neh sa bañ mơ geh hờm. Bol mê lơh broă tĕ ờ di bơh phan sa roh-rui, mơya bơh phan sa găm tŭs tam bơta kĭs rài rài, mơ Kòn kòn-bơnŭs rơpê pà bol mê in; kơyoa tờm Khai neh geh Yàng lah Bàp tăp băng-kì!” Be hơ,ê bol khai đơs mơ Kơnràñ: “Ñchi bol hi păl lơh làng lơh ală broă Yàng dê ?” Kơnràñ Jesu hơ wơl mơ đơs mơ bol khai: “Do lah broă Yàng dê, hơ̆ lah bol mê pindờn dơ Bơtau Khai neh pơyoa tŭs.” Be hơ̆, bol khai đơs mơ Kơnràñ: “Be hơ̆, Đi lơh tềl krơi lơi, làng bol hi gŏ mơ pindờn Đi ? Ñchi Đi lơh ? Ồng-pàng bol hi neh sa manna tam blàng bràs, be neh geh cĭh: “Khai neh ai bol khai in sa bañ bơh trồ.” Be hơ̆, Kơnràñ Jesu đơs mơ bol khai: “Di ngăn, di ngăn, Añ đơs mơ bol mê: Ờ di Moise neh ai bol mê in bañ bơh trồ, mơya Bàp Añ ai bol mê in bañ ngăn-ngồn bơh trồ; kơyoa bañ Yàng dê lah bañ neh mù bơh trồ mơ ai bơta kĭs dunia in.” Be hơ̆, bol khai đơs mơ Kơnràñ: “Ơ Kơnràñ, dăn ai sùm bol hi in bañ hơ̆ ” Kơnràñ Jesu đơs mơ bol khai: “Añ lah bañ bơta kĭs. Cau lơi tŭs mơ Añ, rơpê ờ jơgloh; mơ cau lơi pindờn dơ Añ, rơ̆p ờ tŭ lơi tơhìr.”
Hơ̆ jơnau đơs Kơnràñ dê.
