Ngai Yàng bàr jơ̆t bàr kàl Dăr Năm B

Bơta đăl dùl: Gùng 4. 1-2, 6-8

Bol mê dờn-prăp tĕ ală jơnau-sồr, mơ cèng kĭs jăt mơ broă lơh.

Đăl tam sră Gùng-boh-lăm.

Moise đơ̆s mơ làng-bol be do: Ơ Israel, tŭ do iăt tĕ ală Gùng-boh-lăm mơ jơnau-sồr mơ añ bơto bol mê di lơh jăt, làng geh kĭs mơ geh mŭt sơmbăt geh bơnăh ù, mơ Kơnràñ gơ̆s Yàng pàng yau bol mê dê rơ̆p pà bol mê in. Bol mê bañ bơtơl ngolah tơnhŭc jơnau lơi tam ală jơnau añ neh sồr, mơya dờn-prăp tĕ ală jơnau-sồr Kơnràñ gơ̆s Yàng bol mê dê mơ añ neh bơto-sồr bol mê. Bol mê di dờn-prăp mơ lơh jăt, tài bơh hơ̆ lah bơta ngăc-ngăr mơ chài rơgơi bol mê dê dơ đăp măt ală làng-bol, làng tŭ kơno đơ̆s jơh tơl ală Gùng-boh-lăm hơ̆, bol khai đơ̆s: Ngăn, jơi-nòi dờng-rơyŭ do gơ̆s dùl làng-bol ngăc-ngăr mơ chài-rơgơi. Ờ gŏ geh dùl jơi-nòi lơi geh ală huềng ơm hơ gah he, be Kơnràñ gơ̆s Yàng he ơm hơ gah he, tŭ he hòi-dăn Khai. Geh jơi-nòi tiơ̆ng-pơnrơ ndai lơi geh gùng lơh-yàng, gùng sồr song-dơpă, mơ bơta boh-lăm be añ neh ràng-tơlĭk dơ đăp măt bol mê ngai do sơl ờ ?

Hơ̆ jơnau đơ̆s Kơnràñ dê.

 

Nrĭ-nrềng: 14. 2-3a, 3bc-4ab, 5

Hw: Ơ Kơnràñ, ñcau geh ơm kĭs hơ đăng bơnơm niămgoh Đi dê ?

Cau kĭs niăm-song mơ lơh jăt song-ring, mơ tam nùs kơlôi-sơnơng jơnau ngăn, mơ mpiăt ờ bơcĕh gùng pơrdah. Hw

Cau ờ tơniơ̆h rơh-ndrăng, krung ờ tơmbàs cau lơi ơm rềp. Sền ờ sơ̆p bol bơsăk nùs, mơ duh-gơboh bol cau duh-ngòt Kơnràñ. Hw

Cau ai càn mơ ờ kờp cồng, krung ờ sa-kuề tơniơ̆h cau niăm. Cau lơi lơh ală bơta do, gen ờ tŭ lơi gơ wañ gơ plơ̆. Hw

 

Bơta đăl bàr: Jk 1. 17-18, 21b-22, 27

Oh mi lơh jăt tĕ bơr neh iăt.

Đăl tam sră Jakobe, cau Dờp-pơyoa bơtoăh dê.

Ơ oh mi kờñ-gơboh, ală bơta niăm mơ ală bơta bơtoăh wil-tơl bơ̆h bơ̆h hơ đăng lơm, bơ̆h bơ̆h Bàp lơm tơntŭh, gơ̆s Bơtau crơnggơ̆s ală sơrmañ, tam Khai, ờ gŏ geh bơta gơ gơl, bŭlah mbur gơ dê. Khai neh kờñ deh-dùh he mơ bơr ngăn ngồn, làng he gơjềng be phan bồ-sơnăm tam ală phan crơnggơ̆s. Gen tàng, oh mi tă-tơlĭk tĕ ală bơta bơ̆-bơl mơ nùs bềng iơ̆h-bơsăk, oh mi gơlòng-sồr tĕ wă- dờp bơr neh sĭh tam nùs oh mi, bơr geh pràn tơngklàs sồp-soàn oh mi. Oh mi lơh jăt tĕ bơr neh iăt, bañ iăt gời mơ pơrlồm ĭs să he. Nùs mềr-đào sàng-goh mơ ờ tềl bơ̆ bal mơ Yàng Bàp lah: Còp-cul bol kòn-đời mơ bol aruh-bàng tam tŭ kòl-yăn kăl-ke, mơ griăp să he klàs bơ̆h ală bơta bơ̆-bơl rài do dê.

Hơ̆ jơnau đơ̆s Kơnràñ dê.

 

ALLELUIA: Jn 14.5

Alleluia. Alleluia. Kơnràñ đơ̆s: Añ lah gùng, bơta ngăn mơ bơta kĭs; ờ geh cau lơi tŭs mơ Bàp, dilah ờ găn Añ. Alleluia

Jơnau Yălniăm: Mk 7. 1-8a, 14-15, 21-23

Bol mê lời jơnau sồr-lăm Yàng dê mơ prăp jơnau bơhiàn kòn-bơnŭs dê.

Đăl tam Jơnau Yălniăm niămgoh jăt Marko.

Tŭ hơ̆, geh bol Phariseo mơ bàr pe nă cau gơnoăr-cĭh tŭs bơh Jerusalem, tơrgùm bal gùt-dăr Kơnràñ; mơ tŭ bol khai gŏ bàr pe nă cau jăt-dờn Kơnràñ dê sào-sa mơ tê bơ̆-bơl, hơ̆ lah ờ rào – kơyoa bol Phariseo mơ jơh ală cau Juđe prăp jơnau bơhiàn ală cau yau dê, dilah ờ rào tê nền, gen bol khai ờ sào-sa; mơ rê bơh drà, dilah ờ um, gen bol khai ờ sào-sa; mơ bol khai găm prăp rà jơnau ndai: be rào coàn, bơngàn, gri mơ phan kòng – bol Phariseo mơ bol gơnoăr-cĭh lùp Kơnràñ: “Ñchi gơlơh bol jăt-dờn Đi dê ờ jăt jơnau bơhiàn ală cau yau dê, mơya bol khai sào-sa mơ tê bơ̆-bơl ?” Kơnràñ đơ̆s mơ bol khai: “Isaia neh đơ̆s ala di ngăn gơrềng bơh bol mê, lah bol cau blăc-să, be neh cĭh: Làng-bol do dờn-duh Añ mơ sơndồi-bơr, mơya nùs bol khai ngài mơ Añ; bol khai duh-khoai Añ lah ờ kuơ, bơh ală jơnau bol khai bơto mìng lah ală jơnau sồr kòn-bơnŭs dê. Bol mê lời jơnau sồr-lăm Yàng dê mơ prăp jơnau bơhiàn kòn-bơnŭs dê.” Kơnràñ hòi tai mpồl làng-bol tŭs, mơ đơ̆s mơ bol khai: “Iăt tĕ Añ, ơ jơh ală cau, mơ wă tĕ: Ờ geh chi lơi bơdìh cau mŭt tam cau, rơgơi lơh bơ̆-bơl cau in; mơya ală bơta lĭk bơh cau, gen ală bơta hơ̆ lơh bơ̆-bơl cau in!” Kơyoa bơh tam dơlăm, bơh tam nùs cau gơlĭk ală bơta kơlôi iơ̆h, dri-tơlàr, tung-kơñau, gơsơ̆t cau, bơrnàn, hàm-hà, iơ̆h-bơsăk, blăc-lèo, sơlùng-sơlàng, iơ̆h măt, tràl-sơrbil, pơnhừ-să, thừ nùs: jơh ală bơta iơ̆h hơ̆ lĭk bơh tam dơlăm mơ lơh bơ̆-bơl cau in.

Hơ̆ jơnau đơ̆s Kơnràñ dê.