Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Is 53. 10-11
Dilah khai pơdơng să lơh phan săl tìs, khai rơ̆p gŏ dùl jơi-bơtiàn gơ̆s sùm.
Đăl tam sră Isaia, cau ala-bơr dê.
Kơnràñ neh kờñ tơnyăn khai tam bơta jê-bòl. Dilah khai pơdơng să lơh phan săl tìs, khai rơ̆p gŏ dùl jơi-bơtiàn gơ̆s sùm, mơ bơh khai, nùs kờñ Kơnràñ dê rơ̆p sir-gơ̆s. Kơnờm dơ bơta jê nùs khai dê, khai rơ̆p gŏ mơ rơ̆p geh hừh-hơh. Kơnờm dơ jơnau gĭt-wă, cau duh-broă song-dơpă Añ dê rơ̆p pơnsong-dơpă rà cau, rơ̆p àñ wơl ală tìs iơ̆h bol khai dê.
Hơ̆ jơnau đơ̆s Kơnràñ dê.
Nrĭ-nrềng: 32. 4-5, 18-19, 20 mơ 22
Hw: Ơ Kơnràñ, dăn tuh nùs tơpă-tơpài Đi dê hi in, jăt be hi sùm pin-kơnờm dơ Đi.
Bơr Kơnràñ dê gơ̆s bơr song-dơpă, broă Khai dê gơ̆s broă song-ngăn. Khai gơboh mơ bơta song-dơpă, bơta niăm Khai dê băm-lìu dunia. Hw
Do măt Kơnràñ rơmê-sền cau duh-ngòt Khai, mơ sền gŏ cau pin-kơnờm dơ bơta hànggoh Khai dê, làng klàs sồp-soàn bol khai bơh bơta chơ̆t, mơ siăm-ròng bol khai tam bơta rơbah-dồn. Hw
Sồp-soàn hi kơ̆p-càng Kơnràñ, Bơh Khai sùm gràng-gàr dong-kờl hi. Ơ Kơnràñ dăn tuh nùs tơpă-tơpài Đi dê hi in, jăt be hi sùm pin-kơnờm dơ Đi. Hw
Bơta đăl bàr: Hebrơ 4. 14-16
He kơnờm kơ̆-nhăp tĕ mơ lòt tŭs dơ đăp sơbàn hànggoh.
Đăl tam sră Paulo, cau Dờp-pơyoa bơtoăh, pơyoa bol Hebrơ in.
Ơ oh mi kờñ-gơboh, he geh dùl nă cau lơh-yàng dờng-rơyŭ neh lòt găn ală tăp trồ, lah Kơnràñ Jesu, Kòn Yàng, gen he prăp-kơ̆ tĕ broă yăl-tơlĭk bơta pindờn he dê. Kơyoa, ờ di he geh dùl nă cau lơh-yàng dờng ờ gĭt tam wă mơ bơta lơbơn-lơñơ he dê, sơlơ̆u wơl, Khai neh ờs kong tơlòng tam tơl bơta be he sơl, mìng ờ tìs glài. Gen tàng he kơnờm kơ̆-nhăp tĕ mơ lòt tŭs dơ đăp sơbàn hànggoh, làng wă- dờp nùs tơpă-tơpài mơ sơwì-jòi bơta hànggoh, làng bàn wơl bơta niăm dong-kờl tơl di tŭ.
Hơ̆ jơnau đơ̆s Kơnràñ dê.
ALLELUIA: Mk 10. 45b
Alleluia. Alleluia. Kòn kòn-bơnŭs tŭs làng duh-broă, mơ pà bơta kĭs Khai dê gơ̆s bơta tơwài găl cau in. Alleluia.
Jơnau Yălniăm: Mk 10. 35-45
Kòn kòn-bơnŭs tŭs làng pà bơta kĭs Khai dê gơ̆s bơta tơwài găl cau in.
Đăl tam Jơnau Yălniăm niămgoh jăt Marko.
Tŭ hơ̆, Jakobe mơ Joan lah bol kòn klau Zebeđe dê, tŭs mơ đơ̆s mơ Kơnràñ: “Ơ Pôgru, bol kòn kờñ Đi lơh bol kòn in jơnau bol kòn dăn mơ Đi.” Kơnràñ đơ̆s mơ bol khai: “Ñchi jơnau bol kòn kờñ Añ lơh bol kòn in taih ?” Bol khai đơ̆s mơ Kơnràñ: “Dăn ai bol kòn in, dùl nă nggui đah ma, mơ dùl nă nggui đah kiau tam bơta gơklŏ Đi dê.” Kơnràñ Jesu đơ̆s mơ bol khai: “Bol kòn ờ gĭt bơta bol kòn dăn. Bol kòn rơgơi hùc coàn mơ Añ rơ̆p hùc, ngolah dờp bơta pơnđum mơ Añ rơ̆p dờp sơl ờ ?” Bol khai đơ̆s mơ Kơnràñ: “Bol kòn rơgơi.” Kơnràñ Jesu đơ̆s mơ bol khai: “Coàn Añ rơ̆p hùc, bol kòn krung rơ̆p hùc, mơ bơta pơnđum Añ rơ̆p dờp, bol kòn krung rơ̆p dờp; mơya nggui đah ma ngolah đah kiau Añ, gen ờ di Añ geh gơnoăr ai, mơya ai ală cau in mơ bơta hơ̆ neh geh rơcăng lài.” Dơ̆ Jơ̆t nă cau jăt-dờn kơno jơnau hơ̆, gen gơjrañ mơ Jakobe mơ Joan. Kơnràñ Jesu hòi bol khai mơ đơ̆s mơ bol khai: “Bol kòn gĭt lah, bol cau geh sền lah lăm-bồ ală làng-bol gen ăt-bồ bol khai, mơ bol cau lăm-bồ ală làng-bol gen geh gơnoăr bol khai dê. Ờ di be hơ̆ tam bol kòn, mơya cau lơi kờñ gơ̆s dờng rơlau tam gùl bol kòn, gen cau hơ̆ rơ̆p gơ̆s cau dong-broă bol kòn dê; mơ cau lơi kờñ gơ̆s lài jơh tam bol kòn, gen cau hơ̆ rơ̆p gơ̆s cau duh-broă jơh ală cau dê; kơyoa Kòn kòn-bơnŭs ờ tŭs làng cau duh-broă Khai in, mơya làng duh-broă mơ pà bơta kĭs Khai dê gơ̆s bơta tơwài găl cau in.”
Hơ̆ jơnau đơ̆s Kơnràñ dê.
