Ngai Yàng bàr jơ̆t phàm kàl Dăr Năm B

Bơta đăl dùl: Ngăc-ngăr 7. 7-10

Pơndrờm bơta păs-gơ̆s mơ bơta ngăc-ngăr, añ kờp bơta păs-gơ̆s be gời.

Đăl tam sră Ngăc-ngăr.

Añ neh wờl-kờñ geh pà bơta gĭt-wă, añ khoai-dăn geh huềng-nhơm ngăc-ngăr tŭs mơ añ. Añ kờp bơta ngăc-ngăr lĭn rơlau mơ lơgăr-bơtau mơ sơbàn màh. Pơndrờm bơta păs-gơ̆s mơ bơta ngăc-ngăr, añ kờp bơta păs-gơ̆s be gời. Añ krung ờ pơndrờm gơ mơ lŭ màng, bơh tơl jơi màh pơndrờm mơ gơ, gen kờp be ù- mbè. Añ sền màng bơta ngăc-ngăr rơlau lah bơta pràn mơ să hàng, añ kờp gơ lah rơlau geh bơta àng, bơh bơta àng gơ dê ờ tŭ lơi chơ̆t. Jơh tơl ală bơta niăm tŭs lơm mơ añ lơh dùl bal mơ gơ, mơ kơnờm dơ tê gơ dê, añ geh ngăn-song ờ rơgơi kờp.

Hơ̆ jơnau đơ̆s Kơnràñ dê.

 

Nrĭ-nrềng: 89. 12-13, 14-15, 16-17

Hw: Dăn ai hi in gờñ hừh-hờm bơta niăm Đi dê, làng hi chờhờp-chờchờr.

Dăn bơto hi gĭt kờp tŭ-tơngai, Làng hi bơsrŏng wơl nùs-tồr ngăc-ngăr. Ơ Kơnràñ, dăn rê wơl, – găm lời tŭs tŭ lơi taih ? – Dăn sơnđio nùs nđàc-sơngĭt cau duh-broă Đi dê. Hw

Dăn ai hi in gờñ geh hờm nùs gơboh Đi dê, làng hi in chờhờp-chờchờr jơh rài kĭs hi. Dăn ai hi in geh dờp bơta hànggoh Đi gơ̆s Yàng hi, cồng-nha tê hi lơh, dăn Đi tơngkơ̆, dăn Đi tơngkơ̆, cồng-nha tê hi lơh. Hw

Dăn ai bol duh-broă sền gŏ broă-lơh Đi dê, mơ ai oh kòn bol khai in gŏ bơta gơklŏ Đi dê. Dăn ai hi in geh chờ dờp nùs niăm-lơnhơn Đi dê. Broă tê hi lơh, dăn Đi tơngkơ̆, dăn tơngkơ̆ broă tê hi lơh. Hw

 

Bơta đăl bàr: Hebrơ 4. 12-13

Bơr Kơnràñ dê căh ĭs nùs boh-bài mơ bơta kơlôi bồ-tồr dê.

Đăl tam sră Paulo, cau Dờp-pơyoa bơtoăh, pơyoa bol Hebrơ in.

Ơ oh mi kờñ-gơboh, bơr Yàng dê gơ̆s bơr kĭs sùm, bă-tàm, sồt-hơr rơlau mơ đào bàr măt, blŏng-blŭh tiăn tŭs căh-ĭs sồp-soàn mơ huềng-nhơm, gòl-ară mơ bồ-khu, căh-ĭs nùs boh-bài mơ bơta kơlôi bồ tồr dê. Ờ gŏ geh dùl jơi crơnggơ̆s lơi rơgơi pồn-ndơ̆p dơ đăp măt Kơnràñ. Jơh tơl ală bơta ràng loh lơm mơ sơnđio-tơlĭk dơ đăp măt Bơtau mơ he di săl jơnau dê.

Hơ̆ jơnau đơ̆s Kơnràñ dê.

 

ALLELUIA: Lk 19. 38

Alleluia. Alleluia. Yălniăm Bơtau tŭs bơh sơnđăn Kơnràñ! Ring-lơngai tam trồ, mơ gơklŏ tam ală kơloàng trồ! Alleluia.

Jơnau Yălniăm: Mk 10. 17-30

Mê tăc tĕ jơh ală bơta mê geh, mơ tŭs tĕ jăt Añ.

Đăl tam Jơnau Yălniăm niămgoh jăt Marko.

Tŭ hơ̆, dơ̆ Kơnràñ rơ̆p lĭk-lòt, gen geh dùl nă cau ntoăt tŭs, cùl-kơltăng dơ đăp măt Khai mơ lùp Khai: “Ơ Pôgru niăm-lơnhơn, chi añ păl lơh làng dờp-geh bơta kĭs rài rài taih ?” Kơnràñ đơ̆s mơ khai: “Ñchi bơh tài mê đơ̆s Añ lah niămlơnhơn taih ? Ờ geh cau lơi niăm-lơnhơn, mìng dùl Yàng lơm. Mê neh gĭt ală jơnau-sồr: Bañ gơsơ̆t cau, bañ lơh bơrnàn, bañ tung-kơñau, bañ lơh cơng blăc, bañ pơrlồm-pơrlơm cau, dờn-duh tĕ bàp mơ mè mê.” Cau hơ̆ đơ̆s mơ Kơnràñ: “Ơ Pôgru, jơh ală jơnau hơ̆ añ neh prăp bơh kơnòm.”

Kơnràñ Jesu rơmê dơ khai, gơboh mơ khai mơ đơ̆s mơ khai: “Mê phơ̆t dùl jơnau lơm: Lòt tĕ tăc jơh ală bơta mê geh mơ pà bol rơbah in, gen mê rơ̆p geh đăm phan-màng tam trồ; mơ tŭs tĕ jăt Añ.” Dơ̆ kơno jơnau hơ̆, khai moătjrùng lĭk-lòt: Bơh khai geh oă phan-bơna. Kơnràñ rơmê gùt-dăr, đơ̆s mơ bol jăt-dờn Khai dê: “Bol geh priă-jền mŭt tam lơgăr Yàng lah kal-ke ngăn.” Kơno ală jơnau đơ̆s Kơnràñ dê, bol jăt-dờn ai lơh crih-crài. Mơya Kơnràñ hơ wơl mơ đơ̆s mơ bol khai tai: “Ơ bolkòn, mŭt tam lơgăr Yàng lah kal-ke ngăn. Làk-đà lòt găn trồm jrum gen buơn rơlau mơ cau păs-sơm mŭt tam lơgăr Yàng.” Bol khai sơlơ ai lơh krơi mơ đơ̆s ndring bol khai: “Beh hơ̆, ñcau rơgơi geh tơngklàs taih ?” Kơnràñ Jesu sền dơ bol khai mơ đơ̆s: “Mơ kòn-bơnŭs gen ờ rơgơi, mơya ờ di be hơ̆ mơ Yàng: Kơyoa jơh ală bơta rơgơi lơm mơ Yàng.” Petro pờ bơr đơ̆s mơ Kơnràñ: “Do bol kòn neh săng-lời jơh ală bơta mơ jăt Đi.” Kơnràñ Jesu đơ̆s: “Di ngăn, Añ đơ̆s mơ bol kòn: Ờ gơ̆s cau lơi săng hìu- đăm, oh-mi, ruh-lŏ, mè, bàp, oh kòn, ngolah sre-brê tài bơh Añ mơ tài bơh Jơnau Yălniăm, mơ ờ dờp dùl rơhiăng dơ̆ rơlau, tŭ do, tam rài do, hìu-đăm, oh-mi, ruh-lŏ, mè, oh kòn, mơ sre-brê, bal mơ bơta kŭp-kuăn, mơ bơta kĭs sùm tam rài tơnơ̆.

Hơ̆ jơnau đơ̆s Kơnràñ dê.