Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Jơnau Yălniăm: Jn 2. 13-25
Bol mê lơh tơrlah tĕ hìu duh-khoai do, mơ tam pe ngai Añ rơ̆p bơtào wơl gơ.
Đăl tam Jơnau Yălniăm niămgoh jăt Joan.
Mờr tŭs lèh Lòt Găn bol Juđe dê, Kơnràñ Jesu guh hơ Jerusalem. Khai gŏ tam hìu duh-khoai bol tăc kơnrồ, belàt, ntờp, mơ bol gơl priă găm nggui; Khai ai che lơh gai, bơtrơh jơh ală cau bơh hìu duh-khoai bal mơ belàt, Kơnrồ, lơh prihprah priă-jền bol gơl priă mơ tơlơ cơnờng; Khai đơ̆s mơ bol tăc ntờp: “Cèng-tơlĭk tĕ ală phan do bơh ndo! Bañ lơh hìu Bàp Añ gơ̆s hìu tăc phan.” Bol jăt-dờn Khai dê kah wơl lah neh geh cĭh: “Bơta duh-hur hìu Yàng in sa siăr añ.” Gen bol Juđe hơ wơl mơ đơ̆s mơ Khai: “Tềl lơi Ồng sơnđio bol hi in mơ lơh be hơ̆ ?” Kơnràñ Jesu hơ wơl mơ đơ̆s mơ bol khai: “Bol mê lơh tơrlah tĕ hìu duhkhoai do, mơ tam pe ngai Añ rơ̆p bơtào wơl gơ.” Gen bol Juđe đơ̆s: “Hìu duhkhoai do neh geh băc tam poăn jơ̆t prau sơnăm, mơ Ồng rơ̆p bơtào wơl gơ tam pe ngai ơ ?” Mơya Kơnràñ đơ̆s gơrềng bơh hìu duh-khoai lah să-jăn Khai. Gen tàng, tŭ Kơnràñ kĭs wơl bơh bol cau chơ̆t, bol jăt-dờn Khai dê kah wơl lah Khai neh đơ̆s jơnau hơ̆, mơ bol khai pindờn dơ Sră Goh mơ dơ jơnau Kơnràñ Jesu neh đơ̆s. Tam tŭ Kơnràñ ơm tam Jerusalem, tam ngai lèh Lòt Găn, geh gal cau pindờn dơ sơnđăn Khai, bơh gŏ ală tềl Khai dê mơ Khai neh lơh. Mơya să tờm Kơnràñ Jesu ờ pindờn bol khai, tài bơh Khai gĭt jơh ală cau, mơ Khai ờ càng cau lơi lơh cơng gơrềng bơh kòn-bơnŭs, kơyoa să tờm Khai gĭt geh chi lơi tam kòn-bơnŭs.
Hơ̆ jơnau đơ̆s Kơnràñ dê.
Jơnau Blàng Sră Goh
Lơh Pa Wơl Bơta Pindờn
Tam rơnàng Kơnràñ Jesu, Hìu duh-khoai Jerusalem lah anih niăm-goh krung kong ngui be anih kă-bro. Bol cau tăc-bro belàt, kơnrồ, sềm ntờp mơ pơrgơl priă-jền. Jơh ală broă do krung npồn tơnô̆ sơnđăn duh-broă ală cau lòt duh-khoai, ngăn lah tam tŭ leh dờng bol Jude dê lah leh Lòt Găn. Kơnràñ Jesu neh sền goê bơta do. Kơnràñ Jesu năk-cê bơtrơh bol hô̆tơ-lik bơdìh Hìu duh-khoai. Jơh poan nă cau niăm-goh neh cih wơl bơta do, mơya Joan niăm-goh lah cau neh cih broă lơh Kơnràñ Jesu kràñ nùs ngăn : “Khai ai che lơh gai, bơtrơh ală cau bơh Hìu duh-khoai bal mơ belàt, kơnrồ, lơh prih-prah priă-jền tơ-lik bơh Hìu duh-khoai…”. Bŭ lah be hô̆, dilah pe nă cau cih Sră Goh sơndrờp dô̆ lĕ đơs gơrềng broă Kơnràñ Jesu “Bơtrơh ală cau kăbro tơ-lik bơh Hìu Duh-khoai”, Joan niăm-goh pà git, Kơnràñ mìng dăn bañ cèng ală phăn bơda dunia lơh gơtŭp Hìu Duh-khoai mơ lơh anih niăm-goh gơjềng anih kăbro. Di gơlăn Joan niăm-goh kờñ đơs mơ bol he: Kơnràñ ờ bơtrơh kòn bơnus tìs-glài, mơya bơtrơh ală broă lơh tìs-bìr, be hô̆, Kơnràñ hòi-jà bol he lơh pa wơl broă lơh tam bơta pindờn.
Bơh sơndrờp Kàl Poan Jơt, broă Duh-khoai hòi-jà bol he lơh pa wơl rài kis. Lơh pa wơl làng plai nùs, nùs-nhơm mơ rài kis he dê geh sơlô̆ pa. Ngai-yàng dô̆ Pe Kàl Poan Jơt, broă Duh-khoai bơto bol he sền tĕ wơl bơta duh-khoai Yàng he dê. Kờp nă he lah cau pindờn dơ Yàng. Bơta pindờn hô̆ geh lơh dipal nùs-nhơm duh-khoai Yàng. Geh oă cau pindờn dơ Yàng mơ ờ lơh broă ơs să tờm he dê tam bơta pindờn. Duh-khoai Yàng lah dờp git gơnoar rơyŭ-rơyùm mơ bơta gơboh Yàng dê mơ he, bal mơ ưn ngài, đơs crih yalniăm mơ răc dăn mơ Khai. Geh dồ êt cau jăt-dờn, bơta pindờn bol khai dê gơlik-gơs hàm-kờñ, mìng ntoăt tus dăn mơ Yàng tŭ tìp bơta kalke, jê-yăn, ală tŭ ndai ờ git Yàng lah cau lơi.
Broă lơh Kơnràñ Jesu dê tŭ bơtrơh belàt, kơnrồ tơlik bơh Hìu duh-khoai geh hòi lah “rào-jùt Hìu duh-khoai”. Di ngăn, Kơnràñ Jesu kờñ pơrwơl nùs-nhơm duh-khoai ngăn ngồn, ờ lòt gùng kăbro mơ ờ thàm-kờñ phăn bơda. Kàl Poan Jơt krung dongkờl he rào-jùt rài kis pindờn mơ nùs-nhơm duh-khoai Yàng. Ală broă duh-adăt tam mpồl krung be nă is pal tơlam cau jăt-dờn tus tìp Kơnràñ Jesu, Bơtau găm kis mơ găm tòm măt dơ gùl bol he. Bàp Tờm-ê Fransisco neh cih tam gùng bơto Kơnràñ Kristo găm kis be do: “Ngòt bol he sền Kơnràñ Jesu Kristo mìng be dùl krơh àng yŭt-yau, drờm be sền kir-sơndrài, be dùl Bơtau neh tơngklàs he bơh ndo neh bàr rơbô sơnăm. Bơta do ờ gơlik cồng nha he in, bơh gơ rơp ơn he in yau òr be lài đăp hô̆, gơ rơp ờ tơngklàs he. Bơtau tuh bềng-lìu bơta hàng-goh Yàng dê hơđăng he, Bơtau tơngklàs he, Bơau pơrlô̆ he, Bơtau sơmbời mơ pơndờm pơnđiăng he găm kis. Khai lah Kơnràñ Kristo kis wơl, bềng-lìu bơta kis Yàng dê, soh-dờp bơta àng ờ geh nhàr” (khà 124). Ală jơnau hơđăng Bàp Tờm-ê dongkờl bol he wă loh-làng rơlau gơrềng bơta tòm măt Kơnràñ Jesu tam rài kis ki do. Gal cau jăt-dờn sền Kơnràñ be dùl nă cau dờng-jăk neh gơrồc yau òr. Ờ di be hô̆, Kơnràñ găm kis mơ găm tòm măt dơ gùl bol he. Di wă git bơta hô̆, jơnau đơs, broă lơh mơ bơta kis he dê rơp nền-dàr rơlau. Jơnau răc dăn mơ broă duh-khoai Yàng rơp jrô-git bơta gơboh rơlau. Wă dờp bơta hô̆, cau jăt-dờn sền be tŭp tus dơ Yàng, geh Yàng tề-lam mơ sòl pơnđàng gùng lòt tam rài kis.
Nùs-tồr gơboh Yàng mơ nùs-nhơm duh-khoai tơngkloê Yàng be tă-nhơm, be piăng sào dà hùc bol cau Kristo dê. Kòn bơnus kờñ geh Yàng tòm măt, geh lơh broă mơ gơs niăm-lơnhơn. Dờp git geh Yàng tòm măt tam rài, he pơdơng Yàng in bơta kờñ-gơboh mơ răc dăn mơ Yàng dongkờl tàng he lòt găn ală bơta kalke tơlòng, ală bơta do gơlơh bơta pindờn he in gơs kô̆-nhăp.
Kàl Poan Jơt lah kàl lơh pa wơl. Lơh pa wơl bơta Pindờn lah bơta ai he in pơrgơl pa rài kis. Kơnờm bơta Pindờn ngăn ngồn, bol he kis jơh nùs gùng jăt-dờn đềt-mềr dơđăp măt Yàng mơ dơđăp măt gơp-cau.
Bàp Pier K’ Cheoh
