Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Ll 24. 3-8
Do lah mhàm bơta tam bơrkoăt Yàng neh bơtào mơ bol mê.
Đăl tam sră Lĭk-lòt dê.
Tam ală ngai hơ̆, Moise tŭs yăl wơl làng-bol in kơno jơh ală bơr mơ Gùngboh-lăm Kơnràñ dê, mơ jơh mơ làng-bol dùl bơr hơ bal: Hi dăn lơh jăt ală bơr Kơnràñ neh yăl. Be hơ̆, Moise cĭh wơl jơh ală bơr Kơnràñ dê. Mơ bơh prŭ drim, khai guh bĭc, bơtào jơnào duh-khoai hơ jơng bơnơm, pờ jơ̆t bàr nơm jrŏng, sơnđio jơ̆t bàr jơi-nòi Israel, khai sồr ală cau pơnu tam oh kòn Israel cèng phan chu lơhyàng mơ pồ-pơdơng Kơnràñ in, ală kơnrồ răh lơh phan lơh-yàng tam bơsòr. Moise ai nggùl mhàm tŭh tam ală thu bàk mơ rơsìh nggùl ndai hơ đăng jơnào. Khai lì sră tam bơrkoăt mơ đăl làng-bol in kơno, mơ bol khai hơ: Hi dăn lơh gơ̆s mơ dờn jăt jơh ală jơnau Kơnràñ neh yăl. Be hơ̆ khai ai mhàm prĭh hơ đăng làngbol mơ đơ̆s: Do gơ̆s mhàm bơta tam bơrkoăt Yàng neh bơtào mơ bol mê, jăt di mơ jơh ală bơr hơ̆.
Hơ̆ jơnau đơ̆s Kơnràñ dê.
Nrĭ-nrềng: 115. 12-13, 15-16, 17-18
Hw: Añ rơ̆p dờp coàn tơngklàs, mơ Añ rơ̆p hòi-dăn sơnđăn Kơnràñ.
Ñchi añ ai tam pồ Kơnràñ in, làng sal wơl ală bơta Khai pà añ in taih ? Añ rơ̆p dờp coàn tơngklàs, mơ añ rơ̆p hòi-dăn sơnđăn Kơnràñ. Hw
Dơ đăp măt Kơnràñ, màng-rơyŭ ngăn, bơta chơ̆t ală cau niămgoh Khai dê. Añ gơ̆s cau duh-broă Khai, kòn klau cau ùr duh-broă Khai, Khai neh tơrkă pă che sreng añ in. Hw
Añ rơ̆p pồ-pơdơng Kơnràñ bơr jờngrơ gơ̆s phan lơh-yàng, mơ añ rơ̆p hòi-dăn sơnđăn Kơnràñ. Añ rơ̆p prăp wil-tơl bơr hơ pơrgon mơ Kơnràñ, dơ đăp măt jơh mơ làng-bol Khai dê. Hw
Bơta đăl bàr: Jđ 9. 11-15
Mhàm Kơnràñ Kristo tơngkloh nùs-tồr he.
Đăl tam sră Paulo, cau Dờp-pơyoa bơtoăh, pơyoa bol Juđe in.
Ơ oh mi kờñ-gơboh, Kơnràñ Kristo tơlĭk să ndrờm be cau lơh-yàng dờng kờl răc ală bơta yălniăm rơ̆p tŭs. Khai lòt găn hìu-ing anàng mơ niăm wil-tơl rơlau, ờ di bơh tê cau dunia băc-bơtào, kờñ đơ̆s ờ di gơrê mơ dunia do, krung ờ di bơh mhàm kơnrồ, be, mơya bơh mhàm tờm Khai dê, mơ mŭt hơ Anih Niămgoh mìng dùl dơ̆ lơm mơ cèng wơl bơta tơngklàs jơl ală rài. Bơh di lah mhàm be mơ mbuh kơnrồ mơ cau prĭh hơ đăng cau bơ̆-bơl, găm pơniăm-goh să-jăn gơ̆s sàng-goh wơl, tơài lah mhàm Bơtau Kristo dê, Bơtau neh kơnờm bơh Yàng Nhơm mơ tam pồ să tờm he gơ̆s phan lơh-yàng sàng-goh pơdơng dơ Yàng, mhàm gen rơ̆p jùt kloh nùs-tồr he klàs bơh ală broă gơlĭk bơta chơ̆t, lơh he in rơgơi duh-broă Yàng kĭs sùm. Gen tàng Kơnràñ kristo gơ̆s kòn-gùng bơta tam Bơrkoăt pa, kơyoa kơnờm dơ bơta chơ̆t Khai dê làng tơwài tìs-glài tam rơnàng Bơrkoăt yau, mơ ală cau geh hòi-jà, tŭs wă-dờp wơl jơtài gơ̆s sùm neh hơ pà bol khai in.
Hơ̆ jơnau đơ̆s Kơnràñ dê.
ALLELUIA: Jn 6. 51
Alleluia, Alleluia. Kơnràñ đơ̆s: Añ lah bañ kĭs sùm, neh mù bơh trồ. Dilah cau lơi sa bañ do, gen rơ̆p kĭs rài rài. Alleluia.
Jơnau Yălniăm: Mk 14. 12-16, 22-26
Do lah Să Añ dê, do lah Mhàm Añ dê.
Đăl tam Jơnau Yălniăm niămgoh jăt Marko.
Ngai sơnrờp tam ală ngai lèh Bañ ờ kañ, hơ̆ lah tŭ gơsơ̆t-pơdơng belàt Lòt Găn, bol jăt-dờn Kơnràñ dê đơ̆s mơ Khai: “Ntềng đah Đi kờñ bol kòn lòt rơcăng Đi in sa lèh Lòt Găn taih ?” Kơnràñ pơyoa bàr nă tam bol jăt-dờn Khai dê lòt, mơ đơ̆s mơ bol khai: “Bol kòn lòt tĕ tam bòn dờng, mơ rơ̆p geh dùl nă đoa yăng dà tŭs tìp bol kòn; bol kòn jăt tĕ cau hơ̆, mơ khai mŭt tềng lơi, gen bol kòn đơ̆s tĕ mơ cau tờm hìu: “Pôgru đơ̆s: Ntềng đah Añ rơ̆p sa lèh Lòt Găn bal mơ bol jăt-dờn Añ dê ?” Khai rơ̆p sơnđio bol kòn in dùl adŭ dờng, tăp hơ đăng, neh geh rơcăng; mơ bol kòn rơcăng tĕ bol he in tềng hơ̆.” Bol jăt-dờn lĭk-lòt, tŭs tam bòn dờng mơ gŏ be Kơnràñ neh đơ̆s mơ bol khai, mơ bol khai rơcăng lèh Lòt Găn. Tam tŭ Kơnràñ mơ bol jăt-dờn găm sào, Kơnràñ neh dờp bañ, yălniăm mơ pĕt gơ, pà bol jăt-dờn in mơ đơ̆s: “Bol kòn dờp tĕ: Do lah să Añ dê.” Lồc dờp coàn, Kơnràñ ưn-ngài mơ pà bol jăt-dờn in; mơ jơh ală bol khai hùc coàn gen. Kơnràñ đơ̆s mơ bol khai: “Do lah mhàm Añ dê, mhàm bơta tam bơrkoăt pa, kong tuh bơh rà cau in. Di ngăn, Añ đơ̆s mơ bol kòn: Añ rơ̆p ờ tŭ lơi hùc tai dà ño do jơl tŭs ngai hơ̆, tŭ Añ rơ̆p hùc dà ño tam lơgăr Yàng. Mơ neh đơ̆s-chờ rau, Kơnràñ mơ bol jăt-dờn lĭk-lòt tam bơnơm Olive.
Hơ̆ jơnau đơ̆s Kơnràñ dê.
