Jơnau Yalniam Joan-Pơnah 9

Kơnràñ Jesu tơmbời cau jơngo măt bơh deh

9 1 Lòt găn, Kơnràñ gŏ dùl nă cau jơngo măt bơh deh. 2 Bol jăt-dờn Khai dê lùp Khai mơ đơs: ‘‘Ơ Rabbi, ñcau neh lơh tìs, cau do ngŏlah me bàp khai, tàng khai deh neh jơngo taih ?” 3 Kơnràñ Jesu hơ wơl: ‘‘Ờ di cau do neh lơh tìs, krung ờ di me bàp khai, mơya làng ală broă Yàng dê geh sơnđio-tơlik tam khai. 4 Bol he pal lơh ală broă Bơtau neh pơyoa Añ , tŭ lơi găm ngai; măng tus, ờ geh cau lơi rơgơi lơh broă tai. 5 Tam tŭ Añ  găm ơm tam dunia, Añ  lah bơta àng dunia dê.” 6 Lồc đơs be hơ̆ rau, Kơnràñ choh dơ ù, lơh ù mbè mơ dà diau, mơ bong ù mbè dơ măt khai, 7 mơ đơs mơ khai: ‘‘Lòt tĕ rào tam tơnau Siloe !” – gơ cih-tơlik lah Geh Pơyoa –. Be hơ̆, khai lòt, rào, mơ rê wơl gen gŏ. 8 Gen tàng, ală cau gơp-bòn mơ ală cau neh gŏ khai lài-òr, tài bơh khai lah cau kơnư-dàn, gen đơs:  ‘‘Cau do ờ di lah cau neh nggui mơ lơh kơnư-dàn ơ ?”; 9 bol ndai đơs: ‘‘Khai hơ̆ !”; bol ndai tai đơs: ‘‘Ờ di, mơya lah cau ndrờm be khai !” Ai khai gen đơs: ‘‘Lah Añ  do !” 10 Be hơ̆, bol khai đơs mơ khai: ‘‘Mbe măt mê geh pờ taih ?” 11 Khai hơ wơl: ‘‘Cau sơnđăn lah Jesu neh lơh ù mbè mơ bong măt Añ , mơ đơs mơ Añ : ‘‘Lòt tĕ hơ Siloe mơ rào !” Be hơ̆, Añ  neh lòt, neh rào mơ neh gŏ.” 12 Bol khai đơs mơ khai: ‘‘Ntềng cau hơ̆ ơm ?” Khai đơs: ‘‘Añ  ờ git.”

13 Bol khai lăm cau lài-òr jơngo tus hơ bol Phariseo. 14 Mơya ngai Kơnràñ Jesu lơh ù mbè mơ pờ măt khai lah ngai sabbat. 15 Be hơ̆, bol Phariseo krung lùp khai tai mbe gơlơh khai gŏ. Khai đơs mơ bol khai: ‘‘Cau hơ̆ neh ơn ù mbè dơ măt Añ , Añ  rào mơ Añ  gŏ.” 16 Tam bol Phariseo, geh bol đơs: ‘‘Cau do ờ di bơh Yàng, tài bơh khai ờ prăp ngai sabbat !”; mơya bol ndai đơs: ‘‘Mbe gơlơh dùl nă cau tìs-glài rơgơi lơh ală tềl krơi be hơ̆ taih ?” Mơ geh bơta tamcah tam bol khai. 17 Bol khai đơs tai mơ cau jơngo: ‘‘Ai mê, ñchi mê đơs gơrềng bơh cau neh pờ măt mê ?” Khai đơs: ‘‘Cau hơ̆ lah cau ala-bơr !” 18 Bol Jude ờ pin gơrềng bơh khai lah cau neh jơngo mơ neh gŏ, jơl tus tŭ hòi me bàp cau neh gŏ hơ̆. 19 Bol khai lùp cau me bàp mơ đơs:  ‘‘Cau do lah kòn bol mê, mơ bol mê đơs lah khai jơngo bơh deh ơ ? Be hơ̆, mbe gơlơh tŭ do khai gŏ ?” 20 Me bàp khai hơ wơl mơ đơs: ‘‘Bol hi git cau do lah kòn bol hi mơ khai jơngo bơh deh. 21 Mơya mbe gơlơh tŭ do khai gŏ, bol hi ờ git, ngŏlah ñcau neh pờ măt khai, bol hi krung ờ git; bol mê lùp tĕ să tờm khai. Khai neh tơl sơnăm; khai rơp đơs gơrềng bơh să tờm khai !” 22 Me bàp khai đơs be hơ̆ tài bơh rơngòt bol Jude; kơyoa bol Jude neh dùl nùs bal lah, dilah cau lơi yal-tơlik Kơnràñ lah Bơtau Kristo, gen cau hơ̆ rơp kong tơlik bơh hìu-pơrjum. 23 Gen tàng, me bàp khai đơs: ‘‘Khai neh tơl sơnăm; bol mê lùp tĕ să tờm khai !”

* 24 Be hơ̆, bol khai hòi tai cau lài-òr neh jơngo, mơ đơs mơ khai: ‘‘Mê tơngklŏ tĕ Yàng ! Bol hi git cau hơ̆ lah cau tìs-glài.” 25 Khai hơ wơl: ‘‘Dilah cau hơ̆ lah cau tìs-glài, Añ  ờ git; Añ  git dùl bơta lah, Añ  neh jơngo, mơ do Añ  gŏ.” 26 Bol khai đơs mơ khai: ‘‘Ñchi Khai neh lơh mê in ? Mbe gơlơh Khai neh pờ măt mê ?” 27 Khai hơ wơl mơ bol khai: ‘‘Añ  neh đơs mơ bol mê, mơ bol mê ờ iăt; ñchi gơlơh bol mê kờñ  kơno tai ? Bol mê krung kờñ  gơs bol jăt-dờn Khai dê sơl ơ ?” 28 Bol khai sơrpah khai mơ đơs: ‘‘Mê lah cau jăt-dờn cau hơ̆ dê, ai bol hi lah bol jăt-dờn Moise dê.  29 Bol hi git lah Yàng neh đơs mơ Moise, mơya cau hơ̆ bol hi ờ git Khai mbơh lơi.” 30 Cau hơ̆ hơ wơl mơ đơs mơ bol khai: ‘‘Krơi ngăn bơta do, lah bol mê ờ git Khai mbơh lơi, mơ Khai ya neh pờ măt Añ  ! 31 Bol hi git lah Yàng ờ iăt bol tìs-glài, mơya dilah cau lơi lah cau duh-khoai Yàng mơ lơh jăt nùs-kờñ  Khai dê, gen Khai iăt cau hơ̆. 32 Ờ tŭ lơi kơno lah geh cau lơi neh pờ măt cau jơngo bơh deh; 33 dilah cau hơ̆ ờ di bơh Yàng, gen Khai ờ rơgơi lơh chi lơi.” 34 Bol khai hơ wơl mơ đơs mơ khai: ‘‘Jơh să mê neh deh tam tìs-glài mơ mê bơto bol hi ơ ?” Mơ bol khai tơlik khai hơ bơdìh.

35 Kơnràñ Jesu kơno lah bol khai tơlik khai hơ bơdìh, gen tŭ tìp khai, đơs mơ khai: ‘‘Mê pindờn dơ Kòn kòn-bơnus ờ ?” 36 Khai hơ wơl mơ đơs: ‘‘Ơ Kơnràñ, cau hơ̆ lah ñcau, làng Añ  pindờn dơ Khai ?” 37 Kơnràñ Jesu đơs mơ khai: ‘‘Mê neh gŏ Khai; mơ cau đơs mơ mê, tờm lah Khai.” 38 Khai đơs: ‘‘Añ  pindờn, ơ Kơnràñ !”; mơ khai duh-khoai Kơnràñ. * 39 Kơnràñ Jesu đơs mơ khai: ‘‘Añ  neh tus tam dunia do làng cah-rơđa, làng bol lơi ờ gŏ gen gŏ, mơ bol lơi gŏ gen gơs jơngo.” 40 Tam bol Phariseo, geh bol ơm bal mơ Kơnràñ kơno be hơ̆, gen đơs mơ Kơnràñ: ‘‘Bol hi krung jơngo sơl ơ ?” 41 Kơnràñ Jesu đơs mơ bol khai: ‘‘Dilah bol mê jơngo, gen bol mê ờ geh tìs. Mơya tŭ do bol mê đơs: ‘‘Bol hi gŏ !”; gen tìs bol mê găm wơl.”