Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Dùl nă cau ùr cau kup bơrnàn
8 1 Ai Kơnràñ Jesu lik-lòt hơ bơnơm Olive. 2 Àng drim, Khai tus tai tam hìu duh-khoai, mơ jơh làng-bol tus hơ Khai, mơ Khai nggui bơto bol khai. 3 Bol gơnoar-cih mơ bol Phariseo cèng tus dùl nă cau ùr cau kup bơrnàn, ơn khai dơ gùl 4 mơ đơs mơ Kơnràñ: ‘‘Ơ Pôgru, cau ùr do cau bàn bơrnàn. 5 Tam gùng boh-lăm, Moise sồr bol hi to lŭ cau be do; be hơ̆, ñchi Đi đơs ?” 6 Bol khai đơs jơnau hơ̆ tơlòng Kơnràñ, làng rơgơi yă Khai. Mơya Kơnràñ Jesu kun să, ai nau tê cih dơ ù. 7 Tài bơh bol khai lùp Kơnràñ sùm, tàng Khai tơngờ mơ đơs mơ bol khai: ‘‘Cau lơi tam bol mê ờ geh tìs, gen to tĕ lŭ lài dơ cau ùr”; 8 mơ Kơnràñ kun să tai, cih dơ ù. 9 Kơno be hơ̆, bol khai lik-lòt, cau do jăt cau ne, sơntờm bơh ală cau kra rơlau, găm mìng dùl nă Kơnràñ ơm wơl, mơ cau ùr ntào dơ gùl. 10 Kơnràñ Jesu tơngờ, đơs mơ khai: ‘‘Ơ ùr gen, ntềng đah bol khai ? Ờ geh cau lơi kup glài ai ơ ?” 11 Cau ùr đơs: ‘‘Ơ Kơnràñ, ờ geh cau lơi.” Kơnràñ Jesu đơs: ‘‘Añ krung ờ kup glài ai; lòt tĕ mơ bañ lơh tìs tai.”
Kơnràñ Jesu, bơta àng dunia dê
* 12 Gen tàng, Kơnràñ Jesu đơs tai mơ bol khai: ‘‘Añ lah bơta àng dunia dê; cau lơi jăt Añ, gen rơp ờ cơnđoà lòt tam klăm-jơngo, mơya rơp geh àng bơta kis dê.”
Tam pơndăng gơrềng bơh jơnau lơh cơng bơh să tờm Kơnràñ Jesu dê
* 13 Be hơ̆, bol Phariseo đơs mơ Khai: ‘‘Mê lơh cơng să tờm mê in; cơng mê dê ờ ngăn-ngồn.” 14 Kơnràñ Jesu hơ wơl mơ đơs mơ bol khai: ‘‘Dilah Añ lơh cơng să tờm Añ in, gen cơng Añ dê lah ngăn-ngồn, tài bơh Añ git mbơh Añ tus mơ ntềng Añ lòt; ai bol mê ờ git mbơh Añ tus ngŏlah ntềng Añ lòt. 15 Bol mê cah-rơđa jăt poăc-să, Añ ờ cah-rơđa cau lơi. 16 Mơ dilah Añ cah-rơđa, gen bơta cah-rơđa Añ dê lah ngăn-ngồn, tài bơh Añ ờ di lah mìng dùl nă, mơya Añ mơ Bàp, lah Bơtau neh pơyoa Añ . 17 Mơ tam gùng boh-lăm bol mê dê, neh geh cih lah, cơng bàr nă dê lah ngăn-ngồn. 18 Añ lah cau lơh cơng să tờm Añ in, mơ Bàp lah Bơtau neh pơyoa Añ krung lơh cơng Añ in.” 19 Be hơ̆, bol khai đơs mơ Khai: ‘‘Ntềng Bàp mê ơm ?” Kơnràñ Jesu hơ wơl: ‘‘Bol mê ờ git Añ , krung ờ git Bàp Añ ; dilah bol mê git Añ , gen digơlăn krung git Bàp Añ sơl.” 20 Kơnràñ neh đơs ală jơnau hơ̆ tam anih ơn đài priă, tŭ bơto tam hìu duh-khoai; mơ ờ geh cau lơi kup Khai, tài bơh jiờ Khai dê ờ hềt tus.
21 Be hơ̆, Kơnràñ đơs tai mơ bol khai: ‘‘Añ lik-lòt, mơ bol mê rơp jòi Añ , mơ bol mê rơp chơt tam tìs bol mê dê ! Tiah Añ lòt, bol mê ờ rơgơi tus.” 22 Be hơ̆, bol Jude đơs: ‘‘Khai rơp gơsơt să tờm ơ, tài bơh Khai đơs: ‘‘Tiah Añ lòt, bol mê ờ rơgơi tus” ?” 23 Kơnràñ đơs mơ bol khai: ‘‘Bol mê gơrê mơ hơđơm, Añ gơrê mơ hơđăng; bol mê gơrê mơ dunia do, Añ ờ gơrê mơ dunia do. * 24 Be hơ̆, Añ neh đơs mơ bol mê lah, bol mê rơp chơt tam tìs bol mê dê; kơyoa dilah bol mê ờ pindờn lah Añ gơs, bol mê rơp chơt tam tìs bol mê dê.” 25 Be hơ̆, bol khai đơs mơ Kơnràñ: ‘‘Mê lah ñcau ?” Kơnràñ Jesu đơs mơ bol khai: ‘‘Lah bơta Añ đơs mơ bol mê bơh sơnrờp ! 26 Añ geh rà jơnau pal đơs mơ cah-rơđa gơrềng bơh bol mê; mơya Bơtau neh pơyoa Añ lah ngăn-ngồn, mơ Añ đơs mơ dunia ală jơnau Añ neh kơno bơh Khai.” 27 Bol khai ờ git lah Kơnràñ đơs mơ bol khai gơrềng bơh Bàp. 28 Be hơ̆, Kơnràñ Jesu đơs mơ bol khai: ‘‘Tŭ bol mê tơngguh Kòn kòn-bơnus, tŭ hơ̆ bol mê git lah Añ gơs mơ Añ ờ lơh chi lơi bơh să tờm Añ , mơya Añ đơs ală bơta be Bàp neh bơto Añ . 29 Mơ Bơtau neh pơyoa Añ , ơm bal mơ Añ ; Khai ờ lời Añ dùl nă, tài bơh Añ sùm lơh ală bơta niăm nùs Khai.” 30 Tŭ Kơnràñ đơs ală jơnau hơ̆, gen geh gal cau pindờn dơ Khai.
Kơnràñ Jesu mơ Abraham
31 Be hơ̆, Kơnràñ Jesu đơs mơ bol Jude neh pindờn Khai: ‘‘Dilah bol mê ơm tam jơnau Añ , gen bol mê ngăn lah bol jăt-dờn Añ dê, 32 mơ bol mê rơp git bơta ngăn-ngồn, mơ bơta ngăn-ngồn rơp tơngklàs bol mê.” 33 Bol khai hơ wơl mơ Kơnràñ: ‘‘Bol hi lah jơi-nòi Abraham dê, mơ ờ tŭ lơi lơh dĭ-gơna cau lơi in ! Mbe mê đơs: ‘‘Bol mê rơp geh tơngklàs” taih ?” 34 Kơnràñ Jesu hơ wơl mơ bol khai: ‘‘Di ngăn, di ngăn, Añ đơs mơ bol mê: Jơh cau lơi lơh tìs, gen gơs dĭ-gơna tìs dê. 35 Cau dĭ-gơna ờ ơm sùm tam hìu; cau kòn ơm sùm. 36 Be hơ̆, dilah Kòn tơngklàs bol mê, gen bol mê ngăn lah bol khăt-gơboh. 37 Añ git lah bol mê lah jơi-nòi Abraham dê; mơya bol mê jòi gơsơt Añ , tài bơh jơnau Añ ờ gơ mut tam bol mê. 38 Añ , Añ đơs ală bơta Añ neh gŏ dơ Bàp Añ ; mơ bol mê, bol mê lơh ală bơta bol mê neh kơno bơh bàp bol mê.” 39 Bol khai hơ wơl mơ đơs mơ Kơnràñ: ‘‘Bàp bol hi lah Abraham.” Kơnràñ Jesu đơs mơ bol khai: ‘‘Dilah bol mê lah kòn Abraham dê, gen bol mê rơp lơh ală broă Abraham dê. 40 Mơya tŭ do bol mê jòi gơsơt Añ , lah cau neh đơs bol mê in bơta ngăn-ngồn mơ Añ neh kơno bơh Yàng; Abraham neh ờ lơh bơta hơ̆. 41 Bol mê lơh ală broă bàp bol mê dê.” Gen bol khai đơs mơ Kơnràñ: ‘‘Bol hi ờ deh bơh bơta dri-tơlàr; bol hi geh dùl nă bàp lah Yàng !” 42 Kơnràñ Jesu đơs mơ bol khai: ‘‘Dilah Yàng lah bàp bol mê, gen bol mê gơboh mơ Añ , kơyoa Añ lik mơ tus bơh Yàng; kơyoa Añ ờ tus bơh să tờm Añ , mơya Khai neh pơyoa Añ . 43 Ñchi bơh tài bol mê ờ wă jơnau đơs Añ dê taih ? Tài bơh bol mê ờ rơgơi iăt jơnau Añ . 44 Bol mê lik bơh bàp lah cà, mơ bol mê kờñ lơh jăt ală bơta hàm-kờñ bàp bol mê dê. Bơh sơnrờp gơ lah cau gơsơt cau, mơ gơ ờ ơm ntào tam bơta ngăn-ngồn, tài bơh bơta ngăn-ngồn ờ gơs tam gơ. Tŭ gơ đơs bơta blăc, gen gơ đơs bơh ală jơnau is gơ dê, tài bơh gơ lah cau đơs blăc mơ lah bàp bơta blăc. 45 Ai Añ , tài bơh Añ đơs bơta ngăn-ngồn, tàng bol mê ờ pindờn Añ . 46 Ñcau tam bol mê lơh cơng Añ geh tìs taih ? Dilah Añ đơs bơta ngăn-ngồn, ñchi gơlơh bol mê ờ pindờn Añ taih ? 47 Cau lơi lik bơh Yàng, gen iăt ală jơnau Yàng dê; bơh hơ̆, bol mê ờ iăt, tài bơh bol mê ờ lik bơh Yàng.”
48 Bol Jude hơ wơl mơ đơs mơ Kơnràñ: ‘‘Bol hi đơs mê lah cau Samaria mơ kong cà lơh, gen ờ di ơ ?” 49 Kơnràñ Jesu đơs: ‘‘Añ ờ kong cà lơh, mơya Añ duh-adăt Bàp Añ , mơ bol mê ờ duh-adăt Añ . 50 Añ ờ jòi bơta gơklŏ Añ dê; geh Bơtau jòi mơ cah-rơđa. 51 Di ngăn, di ngăn, Añ đơs mơ bol mê: Dilah cau lơi prăp jơnau Añ , gen rài rài rơp ờ gŏ bơta chơt.” 52 Be hơ̆, bol Jude đơs mơ Kơnràñ: ‘‘Tŭ do, bol hi git lah mê kong cà lơh. Abraham neh chơt, bol ala-bơr krung be hơ̆, mơya mê đơs: ‘‘Dilah cau lơi prăp jơnau Añ , gen rài rài rơp ờ lep bơta chơt.” 53 Mê dờng rơlau mơ bàp bol hi lah Abraham, lah cau neh chơt ơ ? Bol ala-bơr krung neh chơt ! Mê sền să tờm mê lah ñcau taih ?” 54 Kơnràñ Jesu hơ wơl: ‘‘Dilah Añ tơngklŏ să tờm Añ , gen bơta gơklŏ Añ dê ờ gơs chi lơi; geh Bàp Añ lah Bơtau tơngklŏ Añ , lah Bơtau bol mê đơs: ‘‘Khai lah Yàng bol hi dê !”, 55 mơ bol mê ờ git Khai. Ai Añ , Añ git Khai. Mơ dilah Añ đơs: Añ ờ git Khai, gen Añ krung lah cau blăc, ndrờm be bol mê; mơya Añ git Khai mơ Añ prăp jơnau Khai. * 56 Abraham, bàp bol mê, neh hờn-chờ bơh rơp gŏ ngai Añ dê; Khai neh gŏ mơ neh chờhờp.” 57 Be hơ̆, bol Jude đơs mơ Kơnràñ: ‘‘Mê ờ hềt tus prăm jơt sơnăm mơ neh gŏ Abraham ơ ?” * 58 Kơnràñ Jesu đơs mơ bol khai: ‘‘Di ngăn, di ngăn, Añ đơs mơ bol mê: Lài mơ tŭ Abraham gơs, gen Añ gơs.” 59 Be hơ̆, bol khai ai lŭ làng to Kơnràñ; mơya Kơnràñ Jesu pồn să mơ lik bơh hìu duh-khoai.
