Jơnau Yalniam Joan-Pơnah 11

Lazaro kis wơl

11 1 Geh dùl nă cau kòp-jê, lah Lazaro cau Bethania, bòn Maria mơ Marta oh khai dê. 2 Maria lah cau bong bơđà Kơnràñ in mơ ai sŏ jùt jơng Kơnràñ, oh khai lah Lazaro găm kòp. 3 Be hơ̆, bol lŏ ùr pơyoa cau tus mơ Kơnràñ mơ đơs: ‘‘Ơ Kơnràñ, do, cau Kơnràñ gơboh, găm kòp.”

4 Kơno be hơ̆, Kơnràñ Jesu đơs: ‘‘Bơta kòp do ờ tus chơt, mơya bơh bơta gơklŏ Yàng dê in, làng Kòn Yàng dê geh tơngklŏ kơnờm bơh gơ.” 5 Kơnràñ Jesu gơboh mơ Marta, mơ bi ùr khai, mơ Lazaro. 6 Gen tàng, dơ̆ kơno khai kòp, Kơnràñ ơm wơl bàr ngai tai tam anih Khai găm ơm; 7 lồc gen, Kơnràñ đơs mơ bol jăt-dờn: ‘‘Bol he lòt tĕ hơ Judea tai.” 8 Bol jăt-dờn đơs mơ Kơnràñ: ‘‘Ơ Rabbi, pa do bol Jude jòi to lŭ Đi, mơ Đi tus tai tềng hơ̆ ơ ?” 9 Kơnràñ Jesu hơ wơl: ‘‘Trồ ngai ờ geh jơt bàr jiờ ơ ? Dilah cau lơi lòt tam trồ ngai, gen ờ gơtup, tài bơh gŏ bơta àng dunia do dê; 10 mơya dilah cau lơi lòt tam trồ măng, gen gơtup, tài bơh ờ geh bơta àng tam khai.” 11 Kơnràñ đơs ală jơnau gen, mơ tơnơ̆ hơ̆, Khai đơs mơ bol khai: ‘‘Lazaro, bơyô he dê, bic, mơya Añ tus làng pơrlai khai guh bic.” 12 Be hơ̆, bol jăt-dờn đơs mơ Kơnràñ: ‘‘Ơ Kơnràñ, dilah khai bic, gen khai rơp geh pràn wơl.” 13 Kơnràñ Jesu đơs gơrềng bơh bơta chơt Lazaro dê, ai bol jăt-dờn tồn lah Khai đơs gơrềng bơh bơta bic ờs.  14 Gen tàng, tŭ hơ̆ Kơnràñ Jesu đơs loh mơ bol khai: ‘‘Lazaro neh chơt, 15 mơ tài bơh bol kòn, Añ chờhờp bơh Añ ờ ơm tềng hơ̆, làng bol kòn pindờn; mơya bol he lòt tĕ hơ khai.” 16 Gen tàng, Toma, hòi lah Didymo, đơs mơ bol jăt-dờn gơp-bơyô: ‘‘Bol he sơl, bol he lòt tĕ làng chơt bal mơ Kơnràñ !”

17 Kơnràñ Jesu lòt tus mơ gŏ Lazaro neh poan ngai rau tam bơtô bồc. 18 Bethania ngài mơ Jerusalem pơgăp mờr tus pe kơi-sồ. 19 Gal cau tam bol Jude tus mơ Marta mơ Maria làng pơndờm-pơnđiăng bol khai gơrềng bơh cau oh. 20 Tŭ kơno lah Kơnràñ Jesu tus, Marta lòt rò Kơnràñ; ai Maria gen nggui tam hìu. 21 Tŭ hơ̆, Marta đơs mơ Kơnràñ Jesu: ‘‘Ơ Kơnràñ, dilah Đi neh ơm ndo, gen oh añ ờ chơt. 22 Mơya tŭ do sơl, añ git lah ală bơta lơi Đi dăn mơ Yàng, gen Yàng rơp pà Đi in.” 23 Kơnràñ Jesu đơs mơ khai: ‘‘Oh ai rơp kis wơl.” 24 Marta đơs mơ Kơnràñ: ‘‘Añ git lah oh añ rơp kis wơl tam bơta kis wơl tam ngai lồi-dut.” 25 Kơnràñ Jesu đơs mơ khai: ‘‘Añ lah bơta kis wơl mơ bơta kis. Cau lơi pindờn Añ, bulah neh chơt, krung rơp kis; * 26 mơ jơh ală cau lơi kis mơ pindờn Añ, gen rơp ờ tŭ lơi chơt. Ai pindờn bơta hơ̆ ờ ?” 27 Khai đơs: ‘‘Ơi, ơ Kơnràñ, añ neh pindờn Đi lah Bơtau Kristo, Kòn Yàng dê, neh tus tam dunia.”

28 Tŭ neh đơs ală jơnau hơ̆, khai lòt mơ hòi Maria, oh khai, mơ đơs ờm: ‘‘Pôgru tòm măt mơ hòi ai.” 29 Dơ̆ kơno, Maria ñă-ntào sơrbăc-sơrbăng mơ lòt tus hơ Kơnràñ; 30 kơyoa Kơnràñ Jesu ờ hềt mut tam bòn, mơya Khai găm ơm tam anih Marta lòt rò Khai. 31 Be hơ̆, bol Jude găm ơm bal mơ Maria tam hìu mơ pơndờm-pơnđiăng khai, tŭ gŏ Maria sơrbăc-sơrbăng ñă-ntào mơ lik-lòt, gen jăt khai mơ tồn lah: ‘‘Khai lòt tus hơ bơtô bồc làng ñìm tềng hơ̆.” 32 Gen tàng, Maria, tŭ tus dơ tiah Kơnràñ Jesu ơm, gŏ Kơnràñ, gen khai blup să dơ jơng Kơnràñ mơ đơs mơ Khai: ‘‘Ơ Kơnràñ, dilah Đi ơm ndo, gen oh añ neh ờ chơt !” 33 Gen tàng, Kơnràñ Jesu, dơ̆ gŏ khai ñìm mơ bol Jude lòt tus bal mơ khai krung ñìm, gen nùs-nhơm Kơnràñ ờ suk mơ să Khai sơ̆t-sơềl, 34 mơ Kơnràñ đơs: ‘‘Ntềng đah bol mê ơn khai ?” Bol khai đơs mơ Kơnràñ: ‘‘Ơ Kơnràñ, dăn Đi tus sền.” 35 Kơnràñ Jesu ñìm. 36 Be hơ̆, bol Jude đơs: ‘‘Ne, Khai gơboh mơ cau do git nđờ !” 37 Geh bol tam bol khai đơs: ‘‘Ồng do neh pờ măt cau jơngo in, gen ờ rơgơi lơh làng cau do ờ chơt ơ ?”

38 Gen tàng, Kơnràñ Jesu ờ suk tai tam să tờm, Khai lòt tus hơ bơtô bồc; gơ lah dùl nơm trồm lŭ, mơ gơ geh pơnai lŭ kơrdơl. 39 Kơnràñ Jesu đơs : ‘‘Tă tĕ pơnai lŭ !” Marta, bi ùr cau chơt đơs mơ Khai: ‘‘Ơ Kơnràñ, neh bô ồm; kơyoa neh poan ngai rau !” 40 Kơnràñ Jesu đơs mơ khai: ‘‘Añ neh ờ đơs mơ ai lah, dilah ai pindờn, ai rơp gŏ bơta gơklŏ Yàng dê ơ ?” 41 Be hơ̆, bol khai tă pơnai lŭ. Kơnràñ Jesu tơngờ măt hơđăng mơ đơs: ‘‘Ơ Bàp, Kòn ưn-ngài Bàp bơh Bàp neh iăt Kòn. 42 Kòn git lah Bàp sùm sùm iăt Kòn, mơya tài bơh làng-bol ơm gùt dar, gen Kòn neh đơs, làng bol khai pindờn lah Bàp neh pơyoa Kòn.” 43 Tŭ neh đơs ală jơnau hơ̆ rau, Kơnràñ hòi mơ săp dờng: ‘‘Ơ Lazaro, lik tĕ hơ bơdìh !” 44 Cau neh chơt lik-lòt, jơng mơ tê kong kơt mơ biài pò; mơ muh-măt khai kong gơgòm mơ chèo. Kơnràñ Jesu đơs mơ bol khai: ‘‘Hồ tĕ khai in mơ lời tĕ khai lòt.”

Mpồl tơrña kờn gơsơt Kơnràñ Jesu

45 Gen tàng, gal cau tam bol Jude neh tus mơ Maria mơ neh gŏ ală bơta Kơnràñ lơh, gen neh pindờn dơ Khai; * 46 mơya geh bol cau tam bol hơ̆ lòt mơ bol Phariseo mơ đơs mơ bol khai ală bơta Kơnràñ Jesu neh lơh. 47 Gen tàng, bol lơh-yàng dờng mơ bol Phariseo pơrjum mpồl tơrña mơ đơs: ‘‘Ñchi bol he pal lơh, tài bơh cau do lơh rà tềl krơi ? 48 Dilah bol he lời Khai be hơ̆, gen jơh ală cau rơp pindờn dơ Khai,  mơ bol Roma rơp tus mơ tơnroh anih he mơ làng-bol he sơl !” 49 Dùl nă tam bol hơ̆, lah Kaipha, bơh lah cau lơh-yàng dờng sơnăm hơ̆ dê, đơs mơ bol khai: ‘‘Bol mê ờ git chi lơi, 50 bol mê ờ git lah, gơs kuơ bol mê in lah dùl nă chơt bơh làng-bol in, mơ jơh làng-bol ờ kong roh-rui !” 51 Jơnau hơ̆, khai neh ờ đơs bơh să tờm khai, mơya bơh lah cau lơh-yàng dờng sơnăm hơ̆ dê, khai neh đơs ala lah Kơnràñ Jesu rơp chơt bơh làng-bol in, * 52 mơ ờ di mìng bơh làng-bol in, mơya krung làng tơrgùm ală cau kòn Yàng dê găm ơm nrah-nring gơs dùl. 53 Gen tàng, bơh ngai hơ̆, bol khai kơlôi pal gơsơt Kơnràñ.

54 Be hơ̆, Kơnràñ Jesu ờ lòt-rê loh-làng dơ gùl bol Jude, mơya bơh nhơ̆, khai lòt tus tam kơnhoàl rềp mơ blàng bràs, tus tam bòn dờng hòi lah Ephraim, mơ Khai ơm tềng hơ̆ bal mơ bol jăt-dờn.

6. Broă-lơh dơđăp cau Kơnràñ Jesu dê tus lồi

Leh Lòt Găn mờr tus

55 Neh mờr tus leh Lòt Găn bol Jude dê, mơ geh gal cau bơh ală bòn guh hơ Jeursalem lài mơ leh Lòt Găn làng pơniăm-goh să tờm. 56 Gen tàng, bol khai jòi Kơnràñ Jesu mơ ntào tam hìu duh-khoai, đơs ndring bol khai lah: ‘‘Ñchi bol mê kơlôi ? Khai rơp tus tam ngai leh ơ ?” 57 Bol lơh-yàng dờng mơ bol Phariseo neh ai jơnau sồr lah,  dilah cau lơi git ntềng đah Kơnràñ ơm, gen pal yal, làng bol khai kup Kơnràñ.