Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Cau ê belàt niăm
10 * 1 ‘‘Di ngăn, di ngăn, Añ đơs mơ bol mê: Cau lơi ờ bơh mpồng mơ mut tam wàng belàt, mơya hào bơh tiah ndai, gen cau hơ̆ lah cau blơ̆, cau kơñau; 2 ai cau lơi mut bơh mpồng, gen lah cau ê belàt. 3 Cau kơp mpồng pờ khai in, mơ ală belàt iăt săp khai, mơ khai hòi sơnđăn kờp nơm ală belàt is khai dê mơ lăm bol gơ lik. 4 Tŭ neh tơlik jơh ală belàt is khai dê, khai lòt lài mơ bol gơ, mơ ală belàt jăt khai, bơh bol gơ git săp khai; 5 bol gơ ờ jăt cau krơi, mơya dô pleh khai, bơh bol gơ ờ git săp bol cau krơi.” 6 Kơnràñ Jesu neh đơs mơ bol khai jơnau pơniơu hơ̆; mơya bol khai ờ git-wă ñchi jơnau Kơnràñ đơs mơ bol khai.
7 Gen tàng, Kơnràñ Jesu đơs tai: ‘‘Di ngăn, di ngăn, Añ đơs mơ bol mê: Añ lah mpồng ală belàt dê. 8 Jơh ală cau neh tus lài mơ Añ, lah bol blơ̆, bol kơñau, mơya ală belàt ờ iăt bol khai. 9 Añ lah mpồng: dilah cau lơi bơh Añ mơ mut, gen rơp geh tơngklàs, mơ khai rơp mut, lik mơ bàn blàng ñhơt. 10 Cau kơñau mìng tus làng kơñau, tơnchơt mơ tơnroh; ai Añ tus làng bol gơ geh bơta kis mơ geh bềng lìu rơlau. * 11 Añ lah cau ê niăm: cau ê niăm phi bơta kis he dê bơh ală belàt in; 12 ai cau lơh apah, ờ di lah cau ê, ală belàt ờ di lah phan is khai dê, tàng gŏ so rơhau tus, khai săng ală belàt mơ dô – so rơhau kăp bol gơ mơ lơh gơprah-gơpring –,13 khai dô tài bơh khai lah cau lơh apah mơ ờ gơkoă mơ khai gơrềng bơh ală belàt. 14 Añ lah cau ê niăm: Añ git ală belàt Añ dê, mơ ală belàt Añ dê git Añ, 15 be Bàp git Añ, mơ Añ git Bàp; mơ Añ phi bơta kis Añ dê bơh ală belàt in. * 16 Añ geh ală belàt ndai, bol gơ ờ gơrê mơ wàng do, Añ pal lăm bol gơ rê, mơ bol gơ rơp iăt săp Añ, mơ rơp gơs dùl mpồl, dùl nă cau ê. * 17 Tài bơh hơ̆ Bàp gơboh mơ Añ, bơh Añ phi bơta kis Añ dê làng ai wơl gơ. * 18 Ờ geh cau lơi tă gơ bơh Añ, mơya Añ phi gơ bơh să tờm Añ. Añ geh gơnoar phi gơ mơ geh gơnoar ai wơl gơ. Jơnau sồr do, Añ neh dờp bơh dơ Bàp Añ.”
19 Gơlik gơs bơta tamcah tai tam gùl bol Jude tài bơh ală jơnau đơs hơ̆. 20 Gal cau tam bol khai đơs: ‘‘Khai kong cà lơh mơ sơnrăng ! Ñchi bol mê iăt Khai ?” 21 Bol ndai đơs: ‘‘Ală jơnau đơs hơ̆ ờ di lah cau kong cà lơh dê ! Cà rơgơi pờ măt bol jơngo dê ơ ?”
5. Leh Pồ-pơdơng hìu duh-khoai Kơnràñ Jesu yal-tơlik Khai lah Kòn Yàng dê
22 Tŭ hơ̆, tam Jerusalem cau gờm leh Pồ-pơdơng hìu duh-khoai. Hơ̆ lah kàl noăt; 23 Kơnràñ Jesu cơnđoà lòt tam hìu duh-khoai dơ mpồng rơng Salomon. 24 Be hơ̆, bol Jude ơm gùt dar Kơnràñ mơ đơs mơ Khai: ‘‘Đi lời nùs-tồr bol hi kơlôi wi-wơ jơl tus tŭ lơi taih ? Dilah Đi lah Bơtau Kristo, gen đơs loh tĕ bol hi in !” * 25 Kơnràñ Jesu đơs mơ bol khai: ‘‘Añ neh đơs mơ bol mê, mơ bol mê ờ pindờn; ală broă Añ lơh bơh sơnđăn Bàp Añ, gơ lơh cơng Añ in. 26 Mơya bol mê ờ pindờn, tài bơh bol mê ờ gơrê mơ ală belàt Añ dê. 27 Ală belàt Añ dê iăt jơnau Añ , Añ git bol gơ, mơ bol gơ jăt Añ ; 28 Añ ai bol gơ in bơta kis rài rài, bol gơ rơp ờ roh-rui jơl rài rài, mơ ờ geh cau lơi pìt bol gơ bơh tê Añ . 29 Bơta Bàp Añ neh ai Añ in dờng rơlau mơ jơh ală bơta, mơ ờ geh cau lơi rơgơi pìt gơ bơh tê Bàp. 30 Añ mơ Bàp lah dùl.”
31 Bol Jude ai tai lŭ làng to Kơnràñ. 32 Kơnràñ Jesu hơ wơl mơ bol khai: ‘‘Añ neh sơnđio bol mê in rà broă niăm bơh Bàp; bơh broă lơi tam ală broă hơ̆ mơ bol mê to lŭ Añ taih ?” 33 Bol Jude hơ wơl mơ Kơnràñ: ‘‘Bol hi ờ to lŭ Đi bơh broă niăm, mơya bơh jơnau tràl-sơrbil, mơ tài bơh Đi lah kòn-bơnus mơ lơh să tờm Đi lah Yàng.” * 34 Kơnràñ Jesu hơ wơl mơ bol khai: ‘‘Neh ờ geh cih tam gùng boh-lăm bol mê dê ơ: ‘‘Añ neh đơs: Bol mê lah yàng” ? 35 Dilah gùng boh-lăm hòi ală cau geh jơnau đơs Yàng dê lah ală yàng, mơ Sră Goh ờ rơgơi kong lơh roh, 36 gen mơ cau Bàp neh pơniăm-goh mơ pơyoa tus tam dunia, bol mê đơs: ‘‘Mê đơs tràl-sơrbil !”, tài bơh Añ neh đơs: Añ lah Kòn Yàng dê ? 37 Dilah Añ ờ lơh ală broă Bàp Añ dê, gen bol mê bañ pindờn Añ;
38 mơya dilah Añ lơh, mơ dilah bol mê ờ kờñ pindờn Añ, gen pindờn tĕ ală broă, làng bol mê git mơ wă lah Bàp ơm tam Añ mơ Añ ơm tam Bàp.” 39 Be hơ̆, bol khai jòi kup Kơnràñ; mơya Kơnràñ lik klàs bơh tê bol khai.
Kơnràñ Jesu lòt tai hơ đah ne Jordano
40 Kơnràñ lòt tai hơ đah ne Jordano, tus dơ tiah Joan neh lơh bơta pơnđum dơ̆ sơnrờp, mơ Kơnràñ ơm wơl tềng hơ̆. 41 Gal cau tus hơ Kơnràñ mơ đơs: ‘‘Joan neh ờ lơh tềl krơi lơi; mơya jơh ală bơta Joan neh đơs gơrềng bơh cau do lah di ngăn.” 42 Tềng hơ̆, gal cau neh pindờn dơ Kơnràñ.
