Bol Cău Jòi Che Klăc Tam Brê

 

Brê gen ờs cau lòt jòi sùm che klăc. Dùl ngai, tam tŭ lòt jòi che, geh dùl nă cau plờm kăp tơ jơng, gơtuh mhàm jê ngăn. Khai ai plờm iăt tơ che klăc, be hơ̆, che klăc gơjềng bun dờng ngăn, khai reh che klăc, nisơna gơjềng bàr nă kòn dềt lik bơh che klăcndrờm be kòn pa deh. Jơh bàr nă cau dềt gen lah khai in: ơ bàp, ơ bàp mă añ lam rê tam hìu! Khai nrơ̆t ngăn lồc gen kơlôi mbè mơ lơh taih? Khai brê đau mơ lam rê tam hìu.

Tus tam hìu, bau ùr khai gơjrañ ngăn mơ klau gen, kơyoa bau ùr khai tồn lah ròng bời ba kòn ùr cau ndai. Bau ùr gen, khai sơềl sùm, ờ bài siam ròng, bơklau ròng đau tus dờng rài. Tam tŭ khai neh lòt bòn cau, cau ùr gen siam dồ ềt mơ, gen dờng bol khai ñìm sùm, jơglŏh ờ hờm sa. Tam tŭ bàp gen rê, ai pòr piăng siam. Dùl nă cau ùr dùl mơ-ngàn, dùl nă cau klau dùl mơ-ngàn. Bau ùr khai gen gơjrañ sùm, pah ngai pah ngai tam lơh sùm gơrềâng bơh bàr nă kòn gen. Aêpbơlah khai ròng tam pŏh phàm kơnhai rau, kòn neh di dờng đau, bau klau ờ gŏ jai siam, kơyoa bau ùr khai ờ bài ròng, gen làng khai jòi jơnau buơn tơnchơt bàr nă kòn gen. Dùl ngai bàp jà bàr nă kòn lòt jòi plaikriang lời bol khai in sa. Tam tŭ tŭs rau tơ đờm kriang, bàp guh tơđăng kŏh plai kriang lồc gen lah bol kòn-se dềt gen in, kơyoa khai kơñ tơnchơt: dilah mờr pă añ kŏh kriang do, bol mê lòt đơng yơ. Bol khai đơs: ơi, mờr pă rau kŏh kriang, bàp hòi lòt đơng. Bol khai lòt ơm tam tờm lồc gen yơr tê kơ̆p đơng ntê kriang jơh bàr nă bol khai, mờr pă rau ntê kriang; bol khai rơngòt lồc gen dô. Bàp kŏh tai ntê ndai, mờr pă rau, bàp sồr bol khai đơng tai, bol khai lòt sơl ndrờm bè lài. Chi mờr pă rau, bol khai dô sơl, bàp lùp tai: ñchi gơlơh bol mê dô, buơn lă plai ờ gŏ gơdùh tam tiah? Bol khai wơl đơs: Bol hi rơngòt chơt chi klơn. Bàp bol khai lah: dilah gơ klơn ờ gŏ wĭh chơt ờ. Trồ mho rau bàp jòi sùm jơnau buơn tơnchơt krung ờ rơgơi sơl tơnchơt. Bàr nă kòn-se gen, mơ ờ gŏ luĭ chơt, khai lam rê tai tam hìu tờm.

Tam bàr pe ngai tai, khai lam lòt jòi bùm-blàng tam brê krong ngài ngăn bơh bòn. Bolkhai lòt pơndiă, ờ gŏ bơnañ mơ bàp, kơyoa bol khai ờ gŏ git bàp kờñ tơnchơt bol khai. Be ngai hìng, bàp bol khai lam lòt jòi bùm-blàng dờng ngăn lồc gen tờ, kơyoa tam gen bùm-blàng rà ngăn, bùm-blàng gen jrô ngăn bơh tam tiah ù, tờ ăpbơlah tam pe poan làs sòng bàn bùm tam đơm ù. Bàp bol khai tờ jrô ngăn, tơrđùh lài dùl nơm pềs, lồc gen sồr bol khai mù jơh bàr nă tam đơm trồm gen. Be hơ̆ bol khai mù, ờ rơgơi wơl guh tai tơđăng, bàp hơ\ai lŭ dờng lồc gen til hơđăng trồm. Bol khai kòl tam trồm lồc gen ñìm, bàp neh dô rê rau tam hìu tờm. Tus tam hìu tờm, bau ùr khai ờ gŏ gơjrañ tai, kơyoa bau ùr tồn lah kòn-se neh chơt rau.

Bol kòn-se gen tai, bol khai ñìm pah ngai pah ngai tam trồm, be ngai hìng trồ neh àng rau, geh dùl nơm jùn lòt rềp tơ trồm kòn-se ơm, bol khai dăn jùn pờ lŭ buơn lik. Jùn ờ gŏ pràn pờ. Tus klìu sơl, sồr klìu, klìu pờ krung ờ gŏ jai. Măt tơngai mờr jă jơng rau, be mơ, tus jơrke dờng ngăn, bol khai bơrtăp rơma jơrke. Be mơ, jơrke wơl hơ: ñchi gơlơh bol mê bơrtăp rơma añ bê hơ̆, lời lă añ in pờ lŭ gen, lời bol mê lik bơh trồm gen! Be hơ̆, lời lă añ in pờ lŭ gen, bài bol mê lik bơh trồm gen! Be mơ, bol khai dăn ma lah: dăn ồng pờ bol hi in, bol hi ơm tam do bàr pe ngai do rau: jơglŏh ngăn, ờ geh jơnau sa; kơbàp tơđùh bol hi tam trồm do, lồc gen khai wơl rê; bol hi kơp sùm gơ gŏ chài pờ lòâc gen ờ gŏ chài wơl guh hơ đăng. Be hơ̆, jơrke gen sơnđàc lồc gen pờ bol khai in lờs ngăn, kơyoa jơrke pràn ngăn. Lồâc rau pờ trồm, jơrke ai ờ gŏ chài, kơyoa trồm jrô ngăn. Jơrke rê rau, tus grơ̆t, kơnđà; bol khai sồr yờ, krung ờ gŏ chài. Kòl sùm tam gen tus tơ pŏh phàm ngai bol khai ờ gŏ geh. Bol khai kờñ ngăn chơt ma ờ gŏ chơt.

Be ngai hìng, tus BRÀ dờng ngăn; gơ nrau: kòk kòk. Bol khai bơrtăp rơma tai BRÀ ma lah: ờ chơt krung, ai BRÀ, ai lơh lòt bơsial bol hi tam do ơm rơbah rơbừp ngăn, ờ geh jơnău sa, kơbàp tơđùh tam trồm pŏh phàm ngai do rau. Be mơ, BRÀ gen hơ ma bol khai: ñchi gơlơh bol mê lah bơrtăp añ bời ba tôbờp be hơ̆? lời lă añ in jòi bol mê in gai lời bol mê guh tôđăng. Be mơ, bol khai khoai BRÀ lòâc gen dăn sồr gơ tơnyờ gen lời guh tôđăng. BRÀ sơnđàc bol khai lồc gen rơp tơ cồng gle. Gle gen mù tus tam trồm bol khai ơm; jơh bàr nă bol khai pồân kơnhăp tơ gen lòâc gen BRÀ ñă: be mơ, bol khai, gle yờ tus tôđăng. Tam tŭ tus rau tôđăng, bol khai jòi tiah rê: ờ gŏ git rau! Gen tàng bol khai kòl tai tam gen dùl êt, kơlôi kòl sùm kòl sùm. Cau klau jà cau ùr dà gơhòr tơ đơm bol khai lòt rò dà ăpbơhlah tam poan prăm kilômet.

Tus tam brê gen, geh ndu rà ngăn; bol khai gŏ hwèâng-prìt ơm tam dà; geh đơng cau klau rŭs ồi ào ntơn lòâc gen ñơp ai prìt tam dà. Tus tam dà, ờ gŏ lồc bàn; ñơp sùm ñơp sùm tus tơ noăt ngăn; ma prìt tiah, ờ gŏ. Lồc geh khai noăt ngăn rau; khai bic tê tơngai bài ram noăt. Khai gŏ prìt; be mơ, khai lờl ruh khai in: ờ ne ya gơ, prìt tôđăng; ñchi gơlơh hơ̆ wàih! Tìs añ sơlơ̆ tam dà ne ya prìt tôđăng. Be mơ, khai sreh lồc gen geh sa hờm ngăn. Tam tŭ hờm rau sa, bol khai hờn, gen lòt jăt dà sùm sùm; ma prìt đơng-kah at sùm sa tam gùng kơyoa ờ gŏ geh jơnau sa. Bol khai lòt ngăn lòt ngăn, tìp dà bơt kliù dê. Dà bơ̆t gen rau, kliù bơ̆t dà lời lơh sre. Bol khai gŏ kliù dê piang rà ngăn: mbar piang mbar piang, mbar piang mbar yau. Be mờ, bol khai at sa, ma piang mbar gen rau kliù ai bơt dà bal gơ kơnhăp ngăn. Lồc rau bol khai sa piang mbar, jòi brê bài ơm ngài ngăn kơyoa bol khai rơ-ngòt klìu kŭp. Bol khai bàn rau brê niăm ngăn tô đăng; brê gŏ niăm lòt gen lơ-ar sơnđàc DỜR. Bol khai ơm sùm tam gen măng bic. Tam tŭ ngai, cau klau lòt ai piang mbar klìu dê làng sa sùm sùm be gen, dơh tơl pe poan ngai. Be mơ, klìu gŏ tềl jơng cau dềt tam dà bơ̆t; klìu tồn lah cau lồc gen lah: cà cau dềt-dềt lòt tam do; khai ai sùm piang añ bơt dà, dà añ gơ lòt sùm tôbờp bời ba; căk ngai hìng, añ ơm ma tiah do. Klìu gen rê. Tam tŭ klìu rê, cau dê lòt ai tai piang mbăør. Be ngai hìng, klìu lòt rơwang tai dà sre. Klìu gŏ sùm cau dềt cèng piang mbar. Gen tàng, gơ ơm kriău tơ gah dà bơt tam ñhơt. Măt tơngai jă–dŭng rau ŏh dềt lòt kơñau tai piang mbar be ờs khai lòt be lài. Tus tam dà bơ̆t, klìu tơnrơt lồc gen kup dơ tê khai. Klìu lah khai in: ñchi gơlơh mê kơñau sùm piang mbar añ ơ̆n bơ̆t dà sre? Oh dềt hơ wơl: añ sùm rau ờ ồng; dilah mê kup jàm añ di ya, lồc gen añ rê đau grăp rơpu kơnròâ bol mê in; dilah mê sồr lơh broă ndai krung añ dong ya, kơyoa añ rơbah ngăn, ờ geh piang sa, gen tàng añ lòt ai sùm sùm piăng mbăr do bài sa jêglŏh. Klìu dờn lồc gen lam rê tam hìu, bài sồr grăm rơpu ma sền sŏ dŏ sài sơl. Tam tŭ tus rau tam hìu, be mơ, jơh bol ŏh kòn kòn bau klìu lùp: ờ neh, mbơh bàp rê, brê klờm, brê poăc bol he in sa; ŏh dềt gen rơp lòt ngăn, lòâc gen lah klìu in: ơ òâng añ rơngòt ngăn bol khai kờñ sa poăc añ. Klìu tai, gơ đơs lah dùl êt tam bol ŏh kòn, kòn bau gơ in: khai ờ di sa; añ brê khai lời cèng rơpu bol he in, sền sŏ dŏ săi sơl; bol mê jềâng cau ờ yăn, rơ-yăn ngai găn rơpu. Bol ŏh kòn ờ gŏ cơng sa tai.

Be ngai hìng, klìu sồr ŏh dềt lòt grăp rơpu mơ at phan tơl bơta sơ̆ dùl nơm, yoas dùl nơm, pềs dùl nơm, glah dùl nơm, lềng dà dùl nơm, sơiŏ dùl nơm, piang dùl pơrlơ. Bè mơ, khai lòt grăp rơpu. Tus tam brê grăp rơpu khai ơn rơpu khai tam blàng, lòâc gen jun piang ruh khai in tơ DỜR gùng bơlơh. Tus tam DỜR brê ruh khai ơm, ruh khai lùp: tam brê lơi mê lòt bơh ngai òr añ tồn rŏh tiah? Yal: añ neh klìu kup rau, gơ sồr añgrăp rơpu sùm sùm; khai lah ruh khai in: ai di ơm sùm sùm tam do, tus tơ hìng nau. Lồc gen khai wơl rê grăp rơpu tai, trồ mho rau, khai rê lồc gen yal klìu in: ơ ồng, piang dùl pơrlơ neh rơpu sa rau. Kơyoa piang gen khai ai ơ ruh khai in sa tam brê, klìu ờ gŏ đơs jră khai in. Kờp ngai kờp ngai, lòt grăp rơpu sùm sùm; gen dờng, khai tơn rŏh sùm phan klìu dê. Dùl ngai dùl nơm, dùl ngai dùl nơm, làng ơn ơruh khai in tam brê. Sùm sùm be gen, pah ngai pah ngai, tus tơ klìu gơjrañ ngăn, kờñ sa poăc khai. Dùl drim, klìu sồr lòt bơ̆ dà, să tờm klìu lòt bơh yồ, kờñ pơwi dà ŏh dềt bơ̆, ŏh dềt bơrtap klìu. Dilah khai bơrtăp, be mơ, klìu kăp khai, ŏh dềt ờ gŏ bơrnañ bơrtăp, khai ngòt klìu kăp khai. Tam tŭ khai rê bơ̆ dà, khai yal klìu in: ờ ồng, dà wi ngăn, añ rê gời, ờ gŏ bơ̆. Klìu lah khai in: phi gơ, ờ kơmòn! Hìng nau bơ̆ tai. klìu jòi sùm jơnau bài tơrlòng khai in bơrtăp klìu; mơ ờ geh jơnau, kơyoa khai jăk ngănkơlôi. Oh dềt git klìu gơjrañ kờñ sa poăc khai, kơyoa khai tơnrŏh sùm phan klìu dê, ngai pah ngai tam tŭ grăp rơpu. Gen tàng, khai ngòt ngăn, bơh drim tus tơ mho, khai kơlôi bài jòi jơnau tơnchơt klìu. Tam tŭ lòt grăp rơpu ŏh dềt mòn srồng bài tơchơt klìu. Kờp ngai kờp ngai, khai lơh srồng sùm, tus tơ gen bàr pe rơhiăng srồng.

Dùl mho, tam tŭ bic măng, ŏh dềt sồr klìu yal yau jơnau bơh mò pàng òr. Be mơ klìu yal yau rà ngăn tơl bơta. Lồc rau yal yau, ŏh dềt lùp klìu: ờ ồng jơnau lơi mê ngòt taih ồng? Klìu wơl lùp ŏh dềt tai: Jơnau lơi mê ngòt taih? Oh dềt lah: jơnau añ phung be do: rơwas, jùn, jơrke, dồ, hoa, đe, sềm răc añ phung, bơs, kơrềp, lồi gen jơh ală jơnau añ phung lơm. Klìu tai wơl lah khai in: ờ kơ mòn ñchi gơlơh mê phung rà ngăn jơnau be hơ̆? Ờ gŏ di. Añ ờ gơs añ ờ gơs añ ngòt jơnau do jơnau dă. Gen bàr nơm jơnau añ ngòt ngăn. Be mơ, ŏh dềt gen lùp: mê yal jơnau mê phung lă ồng! Khai lah Klìu in: mê rơngòt bàr bơta gơ gen? Klìu hơ: kơyoa òng gơ nrau be do: h…i….h; lồøc gen tờm rơkiat ntas be do: k….r…u…a..ì. Be mơ, ŏh dềt lah klìu in: ơ ồng bañ ngòt jơnau gen, lời lă, bañ yal tai, klìu lah khai in: mê ngòt ngăn jơnau: cà kơh, cà bơnơm krung mê phung sơl, añ ờ gŏ be gen; bàr jơnau gen mơ añ phung. Jơh rau jơnau tam bơ\brê, bol khi bic lơhă ngăn.

Tam tŭ, ka\ drim, kơyoa klìu kờñ sa sùm poăc khai, klìu sồr guh ai kòi dơ đam jơnhoa ngăn. Be mơ ŏh dềt guh, ma klìu lah khai in: dilah mê ai kòi tam bong dềt, bañ mê tơmềt tam bong dờng yơ! Tam tŭ khai guh rau, klìu buh mrĕ tam ồs, bài mrĕ gen gơs hòi ngăn tam muh ŏh dềt, lời khai in bơrtăp mơ klìu. Mrĕ hòi ngăn, ŏh dềt hòi ngăn, khai ờ rơgơi đơs dùl jơnau lơi sơl, kơyoa khai git rau klìu kờñ sa khai. Tam tŭ ai kòi tam bong dèât, khai tơmềt ờm tam bong dờng,
khai gŏ dul nă cau ùr bun ơm tam gen, klìu jơrkă jơ bàr đah jơng, ơn ròng làng sa hìng nau. Be mơ cau ùr bun lah ŏh dềt gen in: ñchi gơlơh mê ơ tam do, mê ờ ngòt klìu sa ờ? Do rau klìu ròng añ kờñ sa hìng nau. Kơyoa cau ùr bun yal khai in, ŏh dềt gen ngòt ngăn, lồc gen khai mù bơh đam mơ ờ yal dùl bơr klìu in.

Tam tŭ lòt grăp tai rơpu, khai kơlôi sùm ñchi kờñ lơh làng klàs, gen jòi jơnau lời tơnchơt klìu. Dùl ngai, khai lòt grăp rơpu rèâp tam sre kờñ jòi tàm lồc gen òng lời tơnngòt klìu, kơyoa bàr bơta gen klìu ngòt ngăn. Tam tŭ khai geh rau, khai bơto òng mơ tàm: dilah añ ơn bol ai tam kơndŏh, bol ai nrau yơ! Bol òng mơ tàm hơ: di gơ.

Tam tŭ mho, ŏh dềt jòi bùm nha lò sa ris lời gơ in jê kơdul tŭ trồ măng, ŏh sềt sa ris ngăn bùm nha lò. Trồ mho rau, ŏh dềt jê kơdul ngăn, lòâc gen tuh è jŏ ngăn sơl. Tam tŭ khai jê kơndul, dăn ma klìu lời tuh è bơdih, klìu pơha khai in, ờ gŏ càng chi lơi, khai tuh è bơdih lồc gen ai srồng sơn gùt dar mpồng, lời gơ yar lồc gen tơnchơt kliù. Lồc nggùl sơn srồng, khai mut tam hìu, khai ơm dùl êt, jê kơndul tai, khai tuh è tai, lồc gen ai srồng sơn gùt dar mồng. Jơh rau sơn srồng, ŏh dềt mut wơl tam hìu lồc gen bic. Mơr nggùl bơnăng rau, òng mơ tàm nrau tam kơdŏh, khai yồng tôđăm kliù dê. Klìu kah lồc gen klo, òng mơ tàm nrau, tam tŭ klo bol kliù ngòt ngăn lồc gen gơ dô bơdih, ŏh dềt ờ khai lic bơdih, khai dô kiau kiau ma ma, bơh lik tô mpang bơh mpang lik. Klìu dô jơh bơdìh lồc gen yar jơh tam srồng khai sơn, bol klìu chơt jơh. Lồc gen ŏh dềt guh tô đam, wơ̆ bong dờng, lời cau ùr bun in lik bơdìh.

Trồ măng rau, ŏh dềt ai rơpu, sồr hoài klìu lời tơnchơt tam brê ngài ngăn, tam tŭ jơh rau tơp klìu, khai lòt hòi ruh khai, bơh tam dơr rê ơm bal, kơyoa klìu chơt jơh rau. Bol khai ờ gŏ rơngòt tai. Bàr pe ngai bơh ngkời, bol khai lơh dùl nơm hìu dờng lồc gen rơwah jơnau pas bơna klìu dê, bol khai gơs pas ngăn: rà rơpu kơnrồ, sur iar, ada tơhừn, lồc gen jơh ală jơnau rà ngăn. Bơh tam hìu klìu, bol khai prăp bàr bơta kas ngăn: gô dùl bồ, lồc gen bla dùl bồ.

Tam bàr pe ngai bơh ngkời, bol khi lòt mus mìr tam brê ngài ngăn. Sùm bol khai lòt tus tam brê, ngai pah ngai. Dùl ngai, tam tŭ rê mho, bol khai gŏ rà ngăn tềl bol cau lơh broă bol khai in tam hìu. Bol khai nrơt ngăn, ờ gŏ git cau lơi lơh broă gen, kơyoa cau ờ gŏ geh tam gen. Bol khai mut tam hìu: tam cah jơla măt tơngai. Tam bàr pe ngai tai, bol khai mut tam hìu. Tam cahjơla mat tơngai, geh bàr nă cau lik bơh bồ bla: ùr dùl nă, klau dùl nă. Jơh bàr nă bol gen jòi broă lơh mơ krung gen oă ngăn cau dong kờl bal mơ bol khai. Bol cau gen tam pà lơh broă, cau bà pơyah kòi, cau bà jòi lòng, bà lơhroă do broă dă. Tam tŭ ŏh dềt gŏ, khai tơnrơt, lồc gen bàr nă bol gen hơ: bol añ lơh broă sùm mê in, kơyoa bol añ kờñ bau mơ bol mê. Khai hơ wơl: dilah bol ai kờñ bau di gơ. Lồc rau tơnrơt, khai lòt hòi ruh khai tam mìr, rê tam hìu mho kờñ geh tam bau. Lồc tam bau, bol khai ơm wèr tam hìu phàm ngai.

Tam tŭ ngai wèr jơh rau, jơh bol gen lòt mus, lòt sùm be gen tus chu ồs, tus dơ tam biap rơpung. Tam tŭ jơh rau tam kòi tam biap, jơh ală jơnau bol khai tam gơjềng dờng. Hìu bol khai gơs hìu pas bơna sơl, geh cing rơpu rà ngăn, ma geh tơl phan. Tam tŭ biap neh dờng, biap rò lồc gen lòt tus tam bòn me bàp tờm cau siam ròng bol dềt bơh yau òr. Drim gen, bàp bol khai ơm tàñ sah tơ jơng ntùng. Be mơ, cồng biap bơh mìr lòt tus tơ khai. Bàp geh ai sah yoas lồc gen lòt pik biap, biap gen wơl ruc sùm, tus tam mìr cau tam gơ. Bàp gen jăt tus tam mìr sơl.

Mờr tus tam mìr, cau bàp klo iar bol khai nrau: kơk kơ gơ ơ…….lòl. ne kơ bàp lòt jồ mơ bol he, ơ…..lòl. Bol ŏh dềt nrơt, be mơ, bol khai tus tam hìu, tơgờr bơh ngài, gŏ bàp lòt, bol khai hờn ngăn lồc gen đơs: ne bàp lòt jồ mơ bol he tam do. Bàp hiŭ tồr, ờ gŏ git ti bol khai, bàp jàng lah bol khai neh chơt tam trồm bùm blàng. Be mơ, bol gen yal khai in: bol hi mê ăt ơn tam trồm bùm blàng òr, ding hơ̆ do bol hi gơs pas bơna sơl, mê kờñ ròng sơl bol hi, mơ bau ùr mê ờ gŏ bài. Gen mê ơn bol hi tam trồm bùm blàng. Bàp gen git rau, khai kơlôi rơngŏh rơngăc mơ bàssìl.

Lồc tam bŏh bơr, me bàp ờ gŏ bài siam ròng bol khai, tus dơ ngai bol khai bau, mơ geh pas jăk. Bol khai ai tơrnờm bàp in ñô, đơscrih đơs chờ. Lồc bàr pe ngai bàp ơm jồ mơ kòn, khai rê mơ cèng dơ hìu rà ngăn jơnau: kòi, biap, rơpoal, rơpung, plai lềng, khoah phe, lồc gen tơl bơta kòn pơndăp bàpin. Bàp tai, khai ưn-ngài rà ngăn, nùs chờhờp, kơyoa kòn khai ờ gŏ chơt, hìng nau khai lòt còp tai tam tŭ khai rê, bol kòn nting: rê ngăc yơ bàp, hìng nau lòt tai tam do! Lồc tai bol khai nting bau ùr bàp bol khai dê krung kờñ lòt jồ mơ bol khai tam mìr gen: ờ bàp, ngai hìng mê sồr lă kơmè lòt jồ mơ bol hi! Bàp wơl hơ: ngai hìng, añ sồr khai lòt.

Tus tam hìu rau, cau ùr gen lùp bau khai: tang bơh mê geh jơh ală bơta do? Căk mê kơñau phan cau ờ begit? Bơklau yal: ờ gŏ hơ! Jơnau bơh bàr nă kòn añ ròng, sơnđàc ngăn bol khai, bơh òr añ ơn bol khai tam trồm bùm blàng, tŭ do bol khai gơs pas bơna ngăn, mơ jăk chài. Bol khai neh geh bau lơm, ngai hìng, bol khai sồr ai lòt jồ mơ bol khai tam mìr.

Be ngai hìng, ùr gen lòt tus tam mìr, bol ŏh dềt gŏ lồc gen đơs: ơ kơmè bol he lòt jồ. Bol khai ờ chờ, kơyoa ùr gen ờ bài siam rònbol khai. Tam tŭ mè gen tam mìr, bol khai jòi jơnau tàng tơnchơt, kơyoa bơh òr ùr gen tơnchơt bol khai. Lồc rau ai piang ngềt biap ngềt ùr gen in sa, bol khai lòt jòi biap krañ biap ồm, rơpung ồm, phe ồm, kòi ồm dăp tam sah ùr gen brê tơ hìu tờm Jơh jòi biap bol khai lòt kŏh ntùng tơ rơbòng dềt, lời dùh cau ùr gen tam dà. Bol khai ơn biap niăm phe niăm tôđăng lời cau ùr gen in àñ. Tus tơ yung tơ dà rơbòng, tam tŭ tus tam gùl. Ntùng gen pă, khai gơdùh tam dà rơbòng, ồi ào sùh jơh sah sèt jơh, lồc gen jơh jơnau ơn tam sah gơtuh. Tam tŭ ùr gen gŏ biap ồm khai gơ jrañ ngăn, khai jê ngăn sơl dùh bơ\ đăng. Tơ gen khai guh tôđăng, làm să làm bồ sù jơh, ơrơm noat ngăn. Khai rê gời tus tơ hìu tờm, kơyoa sah neh sèt gơ dùh tam dà rơbòng. Tam tŭ khai rê, khai srat bol kòn bàr nă. Tus tam hìu, khai yal bau klau khai in: Ñchi gơlơh bol kòn mê, bol khai lơh ală alai ngăn añ in? Bol khai ai rơpung rơpoal ồm, ơn tam sah sồr añ àñ mơ tai bol khai yờ sào piang ngềt. Bol khai lơh ală alai ngăn añ in. Bau klau hơ mơ bơùr: ñchi gơlơh, ai git? Kơyoa bơh sơnrờp ai ờ gŏ bài siam ròng bol khai, gen dờng bol khai lơh ală alai ai in! Dirau yau gen, kơyoa ai ờ bài siam ròng bol khai tam tŭ gam dềt. Bơh tam tŭ gen, cau ùr tam gơjrañ sùm mơ bơklau khai tus chơt, bol khai tam lơh tam lah sùm, ờ gŏ tŭ lơi niăm bal tus dơ tơngai chơt.